ماڭعىستاۋ وبلىسىندا سوتتالۋشىلاردىڭ جازالارىن قالاي ٶتەپ جاتقاندىعى ولاردىڭ تۋعان-تۋىستارى مەن قۇقىق قورعاۋشىلارعا كٶرسەتٸلدٸ, دەپ حابارلايدى "ۇلت اقپارات" Polisia.kz پورتالىنا سٸلتەمە جاساپ.
بۇعان دەيٸن ماڭعىستاۋ وبلىستىق قىلمىستىق اتقارۋ جٷيەسٸ دەپارتامەنتٸنە قاراستى گم-172/6 مەكەمەسٸ ماڭىنا سوتتالۋشىلاردىڭ تۋىستارى جينالعان ەدٸ. وعان اتالعان مەكەمەگە ەسكەر كٸرگٸزٸلٸپ, سوتتالۋشىلار سوققىعا جىعىلدى دەگەن قاڭقۋ سٶز سەبەپ بولعان.
«قۇقىق قورعاۋ ۇيىمدارىنىڭ ٶكٸلدەرٸ كولونييانى كارانتينگە بايلانىستى بارلىق سانيتارلىق-ەپيدەميولوگييالىق تالاپتاردى ساقتاي وتىرىپ ارالاپ شىقتى. تٷرمەنٸ ارالاۋ بارىسىندا سوتتالۋشىلاردان «مەكەمەگە ەسكەر كٸرگٸزدٸ مە?» دەپ سۇراپ, وعان «جوق» دەگەن جاۋاپ الدى. مۇنىڭ بارلىعى بەينەتاسپاعا تٷسٸرٸلٸپ وتىردى. كەلۋشٸلەر تٷرمە اسحاناسىن, دەمالىس كلۋبىن, جاتىن ورىنداردى ارالاپ كٶردٸ.
مەكەمەنٸ ارالاپ شىققاننان كەيٸن قۇقىق قورعاۋشىلار تۋىستارى تٷرمە جانىندا جينالعان سوتتالۋشىلارمەن جەكە-جەكە ەڭگٸمەلەستٸ. ولاردان مەكەمە قىزمەتكەرلەرٸ نەمەسە سوتتالۋشىلار تاراپىنان «ۇرىپ-سوعۋ بولدى ما?» دەگەن سۇراققا جاۋاپ الىندى. سونىمەن قاتار بۇعان دەيٸن تەلەارنادان ۆيدەوٷندەۋٸ كٶرسەتٸلگەن سوتتالۋشى دا ەڭگٸمەگە تارتىلدى. قۇقىق قورعاۋشىلار وعان كٸنەلٸ تۇلعالار مٸندەتتٸ تٷردە جازاعا تارتىلاتىنىن ايتتى. الايدا, جالعان ايىپتاۋ بولسا, وندا ٶزٸنٸڭ دە جاۋاپكەرشٸلٸككە تارتىلاتىنىن ەسكەرتە وتىرىپ, شاعىم جازۋدى ۇسىندى», - دەلٸنگەن اقپاراتتا.
بٸراق سوتتالۋشى شاعىم جازۋدان باس تارتقان.
«مۇنان بٶلەك, قۇقىق قورعاۋشىلار اتالعان فاكتٸ بويىنشا سوتتالعان ازاماتتىڭ ٶتٸنٸشٸمەن قىلمىستىق ٸس قوزعالعاندىعىن تٷسٸندٸردٸ. قازٸرگٸ ۋاقىتتا اتالعان ماتەريالدى وبلىستىق پروكۋراتۋرا قاراپ جاتىر.
قۇقىق قورعاۋشىلار تٷرمەنٸ ارالاپ شىققاننان كەيٸن سوتتالۋشىلاردىڭ تۋىستارىمەن كەزدەسٸپ, ولارعا مەكەمەنٸ ارالاۋ بارىسىندا تٷسٸرٸلگەن ۆيدەوماتەريالدى كٶرسەتتٸ», - دەدٸ قر ٸٸم-نەن.
