Mańǵystaý oblysynda sottalýshylardyń jazalaryn qalai ótep jatqandyǵy olardyń týǵan-týystary men quqyq qorǵaýshylarǵa kórsetildi, dep habarlaidy "Ult aqparat" Polisia.kz portalyna silteme jasap.
Buǵan deiin Mańǵystaý oblystyq qylmystyq atqarý júiesi departamentine qarasty GM-172/6 mekemesi mańyna sottalýshylardyń týystary jinalǵan edi. Oǵan atalǵan mekemege ásker kirgizilip, sottalýshylar soqqyǵa jyǵyldy degen qańqý sóz sebep bolǵan.
«Quqyq qorǵaý uiymdarynyń ókilderi koloniiany karantinge bailanysty barlyq sanitarlyq-epidemiologiialyq talaptardy saqtai otyryp aralap shyqty. Túrmeni aralaý barysynda sottalýshylardan «mekemege ásker kirgizdi me?» dep surap, oǵan «joq» degen jaýap aldy. Munyń barlyǵy beinetaspaǵa túsirilip otyrdy. Kelýshiler túrme ashanasyn, demalys klýbyn, jatyn oryndardy aralap kórdi.
Mekemeni aralap shyqqannan keiin quqyq qorǵaýshylar týystary túrme janynda jinalǵan sottalýshylarmen jeke-jeke áńgimelesti. Olardan mekeme qyzmetkerleri nemese sottalýshylar tarapynan «uryp-soǵý boldy ma?» degen suraqqa jaýap alyndy. Sonymen qatar buǵan deiin telearnadan videoúndeýi kórsetilgen sottalýshy da áńgimege tartyldy. Quqyq qorǵaýshylar oǵan kináli tulǵalar mindetti túrde jazaǵa tartylatynyn aitty. Alaida, jalǵan aiyptaý bolsa, onda óziniń de jaýapkershilikke tartylatynyn eskerte otyryp, shaǵym jazýdy usyndy», - delingen aqparatta.
Biraq sottalýshy shaǵym jazýdan bas tartqan.
«Munan bólek, quqyq qorǵaýshylar atalǵan fakti boiynsha sottalǵan azamattyń ótinishimen qylmystyq is qozǵalǵandyǵyn túsindirdi. Qazirgi ýaqytta atalǵan materialdy oblystyq prokýratýra qarap jatyr.
Quqyq qorǵaýshylar túrmeni aralap shyqqannan keiin sottalýshylardyń týystarymen kezdesip, olarǵa mekemeni aralaý barysynda túsirilgen videomaterialdy kórsetti», - dedi QR IIM-nen.
