تٷركٸستان وبلىسىندا سىنىپتاسىن زيرات ماڭىنا اپارىپ, سوققىعا جىققان تٶرت جاسٶسپٸرٸمگە قاتىستى سوت ٷكٸمٸ شىقتى. نەگٸزگٸ ايىپتالۋشى 7 جىل 6 ايعا باس بوستاندىعىنان ايىرىلسا, قالعان ٷشەۋٸنە باس بوستاندىعىن شەكتەۋ جازاسى تاعايىندالدى, دەپ حابارلايدى ult.kz.
ٸس تٷركٸستان وبلىستىق كەمەلەتكە تولماعانداردىڭ ٸستەرٸ جٶنٸندەگٸ مامانداندىرىلعان اۋدانارالىق سوتىندا قارالدى. ٷش سوتتالۋشى قىلمىستىق كودەكستٸڭ "بۇزاقىلىق" بابى بويىنشا كٸنەلٸ دەپ تانىلدى. ال نەگٸزگٸ ايىپتالۋشىعا بۇدان بٶلەك "دەنساۋلىققا قاساقانا اۋىر زييان كەلتٸرۋ" بابى بويىنشا دا ايىپ تاعىلدى.
قايعىلى وقيعا ٶتكەن جىلدىڭ قاراشا ايىندا تٷركٸستان قالاسىندا بولعان. سوت ماتەريالدارىنا سەيكەس, جاسٶسپٸرٸمدەر بولماشى سەبەپپەن ٶزدەرٸمەن بٸرگە وقيتىن 9-سىنىپ وقۋشىلارىن زيرات ماڭىنا جيناپ, ساپقا تۇرعىزعان. كەيٸن ولاردىڭ ەرقايسىسىنا كەۋدە تۇسىنان جۇدىرىقپەن سوققى جاساعان. نەگٸزگٸ ايىپتالۋشى جەبٸرلەنۋشٸلەردٸڭ بٸرٸن قوسىمشا بٸرنەشە رەت ۇرىپ, سالدارىنان جاسٶسپٸرٸم وقيعا ورنىندا كٶز جۇمعان.
سوت بارىسىندا ايىپتالۋشىلار كٸنەلارىن تولىق مويىنداپ, ٶكٸنٸش بٸلدٸردٸ. ولار ٶزدەرٸنە باس بوستاندىعىنان ايىرمايتىن جازا تاعايىنداۋدى سۇرادى. سونداي-اق جەبٸرلەنۋشٸلەردٸڭ باسىم بٶلٸگٸ مەن ولاردىڭ زاڭدى ٶكٸلدەرٸ سوتتالۋشىلاردى كەشٸرەتٸندەرٸن ايتىپ, قىلمىستىق ٸستٸ توقتاتۋدى ٶتٸنگەن.
سوت شەشٸمٸمەن نەگٸزگٸ ايىپتالۋشى 7 جىل 6 ايعا باس بوستاندىعىنان ايىرىلدى. قالعان ٷش جاسٶسپٸرٸمگە 1 جىل 4 اي مەرزٸمگە باس بوستاندىعىن شەكتەۋ جازاسى كەسٸلدٸ.
قازا بولعان وقۋشىنىڭ اعاسى سوتتالۋشىلاردىڭ بٸرٸن كەشٸرگەنٸمەن, قالعان ٷشەۋٸنەن 30 ميلليون تەڭگە مورالدىق ٶتەماقى تالاپ ەتتٸ. الايدا سوت ولاردىڭ زاڭدى ٶكٸلدەرٸنٸڭ ەرقايسىسىنان 200 مىڭ تەڭگەدەن مورالدىق شىعىن ٶندٸرۋ تۋرالى شەشٸم شىعاردى.
ٷكٸم ەزٸرگە زاڭدى كٷشٸنە ەنگەن جوق.
