تٷركٸستاننىڭ مەدەني-رۋحاني ورتالىعىن دامىتۋ جۇمىستارى جالعاسۋدا. وبلىس ورتالىعىنداعى قۇرىلىس بارىسىن باقىلاعان تٷركٸستان وبلىسىنىڭ ەكٸمٸ ٶمٸرزاق شٶكەەۆ جاڭا جوبالارمەن تانىستى. جاۋاپتى سالا باسشىلارىمەن بٸرگە قۇرىلىس نىساندارىن ارالاپ, ولارعا بٸرقاتار مٸندەتتەر جٷكتەدٸ, دەپ حابارلايدى «ۇلت اقپارات» تٷركٸستان وبلىسى ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
شاھاردىڭ دامۋىنىڭ 2-كەزەڭٸ تٶرت اۋماقتا جٷزەگە اسىرىلىپ جاتىر. مەدەني-رۋحاني ورتالىقتا «كٷلتٶبە» قالاشىعىنىڭ تاريحي نىساندارىن قالپىنا كەلتٸرۋ, «ەزٸرەت سۇلتان» مۋزەي-قورىعىنىڭ اۋماعىن اباتتاندىرۋ جۇمىستارى جٷرگٸزٸلەدٸ. بۇدان بٶلەك, «كەرۋەن ساراي» تۇرعىن ٷي كەشەنٸ, «امانات» كوتتەدجدٸ قالاشىعى, «Medina Palace» قوناق ٷيٸ, «قىلۋەت» مەدەني-رۋحاني ورتالىعى بوي كٶتەرٸپ كەلەدٸ. سونداي-اق بەكزات ساتتارحانوۆ داڭعىلىنىڭ بويىندا سپورتتىق كەشەن, «ياسسى» جەلٸلٸك ساياباعى, ٸرٸ ساۋدا ورتالىقتارى بوي كٶتەرٸپ, 182 گا ۋنيۆەرستيتەتتٸك بوتانيكالىق باقتى كٷتٸپ-باپتاۋ, «پارك لاين» كوتتەدج كەشەنٸنٸڭ قۇرىلىسى جٷرٸپ جاتىر.
بەكزات ساتتارحانوۆ اتىنداعى بالالار مەن جاسٶسپٸرٸمدەرگە ارنالعان سپورت كەشەنٸ ورنىنان قازٸرگٸ زاماناۋي ٷلگٸدەگٸ سپورت كەشەنٸنٸڭ قۇرىلىسى بىلتىر باستالعان بولاتىن. جوباعا بيىل 1,7 ملرد. تەڭگە قارجى بٶلٸندٸ. نىسان قۇرىلىسى كەلەسٸ جىلى اياقتالادى.
«تٷركٸستاندى تٷركٸ ەلەمٸنٸڭ ورتالىعىنا اينالدىرۋ مٸندەتٸ جٷكتەلدٸ. وسى باعىتتا جۇمىس قارقىنى بەسەڭدەگەن ەمەس. جالپى تٷركٸستان قالاسىن دامىتۋدىڭ ەكٸنشٸ كەزەڭٸندە ينۆەستيتسييالاردىڭ كٶلەمٸ 1,3 ترلن. تەڭگە, ونىڭ 1 ترلن. تەڭگەسٸ نەمەسە 77%-ى – جەكە ينۆەستيتسييالار. ياعني بيۋدجەتتەن باعىتتالعان 1 تەڭگەگە جەكە ينۆەستيتسييالاردىڭ 3 تەڭگەسٸ تيەسٸلٸ. جاڭا كەشەندٸ جوسپاردى ٸسكە اسىرۋ نەتيجەسٸندە 2025 جىلى جالپى ٶڭٸرلٸك ٶنٸم كٶلەمٸ 3,6 ترلن. تەڭگەگە جەتكٸزٸلەتٸن بولادى. قۇرىلىسقا جاۋاپتى باسشىلار مەن مەردٸگەرلەر ەل الدىنداعى جاۋاپكەرشٸلٸكتٸ تەرەڭ سەزٸنٸپ, جۇمىستى ادال ەرٸ ساپالى اتقارۋلارعا تيٸس», – دەدٸ وبلىس ەكٸمٸ ٶمٸرزاق شٶكەەۆ.
ەكٸمشٸلٸك-ٸسكەرلٸك ورتالىعىندا 57 جوبانى سالۋ جوسپارلانعان. اتاپ ايتقاندا, تەننيس ورتالىعى سالىنىپ, مۇز سارايى, ات-سپورت كەشەنٸ, دەمالىس ورىندارىنىڭ قۇرىلىسى جٷرگٸزٸلٸپ جاتىر. سونىمەن بٸرگە ينجەنەرلٸك ينفراقۇرىلىمىن سالۋ جۇمىستارى جالعاسۋدا. ال حالىقارالىق ەۋەجاي اۋماعىندا 12 جوبا ٸسكە اسىرىلادى. ونىڭ ٸشٸندە 100 ورىندىق قوناق ٷي, 3 ۇشاققا تۇراق, 400 گا قارا ٶرٸك باعى, 50 گا جەرگە جىلىجاي, 10 مىڭ باس ٸرٸ قارا بورداقىلاۋ كەشەنٸ, 1200 باس تاۋارلى-سٷت ٶندٸرۋ فەرماسى سالىنادى.
