Túrkistannyń mádeni-rýhani ortalyǵyn damytý jumystary jalǵasýda. Oblys ortalyǵyndaǵy qurylys barysyn baqylaǵan Túrkistan oblysynyń ákimi Ómirzaq Shókeev jańa jobalarmen tanysty. Jaýapty sala basshylarymen birge qurylys nysandaryn aralap, olarǵa birqatar mindetter júktedi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Shahardyń damýynyń 2-kezeńi tórt aýmaqta júzege asyrylyp jatyr. Mádeni-rýhani ortalyqta «Kúltóbe» qalashyǵynyń tarihi nysandaryn qalpyna keltirý, «Áziret Sultan» mýzei-qoryǵynyń aýmaǵyn abattandyrý jumystary júrgiziledi. Budan bólek, «Kerýen Sarai» turǵyn úi kesheni, «Amanat» kottedjdi qalashyǵy, «Medina Palace» qonaq úii, «Qylýet» mádeni-rýhani ortalyǵy boi kóterip keledi. Sondai-aq Bekzat Sattarhanov dańǵylynyń boiynda sporttyq keshen, «Iassy» jelilik saiabaǵy, iri saýda ortalyqtary boi kóterip, 182 ga ýniverstitettik botanikalyq baqty kútip-baptaý, «Park Lain» kottedj kesheniniń qurylysy júrip jatyr.
Bekzat Sattarhanov atyndaǵy balalar men jasóspirimderge arnalǵan sport kesheni ornynan qazirgi zamanaýi úlgidegi sport kesheniniń qurylysy byltyr bastalǵan bolatyn. Jobaǵa biyl 1,7 mlrd. teńge qarjy bólindi. Nysan qurylysy kelesi jyly aiaqtalady.
«Túrkistandy Túrki áleminiń ortalyǵyna ainaldyrý mindeti júkteldi. Osy baǵytta jumys qarqyny báseńdegen emes. Jalpy Túrkistan qalasyn damytýdyń ekinshi kezeńinde investitsiialardyń kólemi 1,3 trln. teńge, onyń 1 trln. teńgesi nemese 77%-y – jeke investitsiialar. Iaǵni biýdjetten baǵyttalǵan 1 teńgege jeke investitsiialardyń 3 teńgesi tiesili. Jańa Keshendi jospardy iske asyrý nátijesinde 2025 jyly jalpy óńirlik ónim kólemi 3,6 trln. teńgege jetkiziletin bolady. Qurylysqa jaýapty basshylar men merdigerler el aldyndaǵy jaýapkershilikti tereń sezinip, jumysty adal ári sapaly atqarýlarǵa tiis», – dedi oblys ákimi Ómirzaq Shókeev.
Ákimshilik-iskerlik ortalyǵynda 57 jobany salý josparlanǵan. Atap aitqanda, tennis ortalyǵy salynyp, muz saraiy, at-sport kesheni, demalys oryndarynyń qurylysy júrgizilip jatyr. Sonymen birge injenerlik infraqurylymyn salý jumystary jalǵasýda. Al halyqaralyq áýejai aýmaǵynda 12 joba iske asyrylady. Onyń ishinde 100 oryndyq qonaq úi, 3 ushaqqa turaq, 400 ga qara órik baǵy, 50 ga jerge jylyjai, 10 myń bas iri qara bordaqylaý kesheni, 1200 bas taýarly-sút óndirý fermasy salynady.
