تۇرعىن ٷيلەردٸڭ كٶپشٸلٸگٸنٸڭ باعاسى ەلٸ دە قىمبات. بۇل تۋرالى ۇلتتىق قوعامدىق سەنٸم كەڭەسٸنٸڭ بەسٸنشٸ وتىرىسىندا قر پرەزيدەنتٸ قاسىم-جومارت توقاەۆ مەلٸم ەتتٸ, دەپ حابارلايدى "ۇلت اقپارات".
«بىلتىر تۇرعىن ٷي قۇرىلىسىنىڭ قارقىنى 11,2 پايىزعا ٶستٸ. بۇل - جاقسى كٶرسەتكٸش. بٸراق ٶڭٸرلەردٸڭ احۋالى ەركەلكٸ. مىسالى, پايدالانۋعا بەرٸلگەن دايىن ٷيلەردٸڭ 40 پايىزى تەك نۇر-سۇلتان, الماتى, شىمكەنت قالالارىندا. ونىڭ ٷستٸنە بۇل ٷيلەردٸڭ كٶپشٸلٸگٸنٸڭ باعاسى ەلٸ دە قىمبات. مەن ٷكٸمەتتٸڭ قاڭتار ايىنداعى كەڭەيتٸلگەن وتىرىسىندا تۇرعىن ٷي ساياساتىن جەتٸلدٸرۋ ٷشٸن جاڭا ۇسىنىستار ەزٸرلەۋدٸ تاپسىردىم. ٷكٸمەت ايتارلىقتاي تيٸمدٸ ۇسىنىستار بەردٸ. جالپى بۇل ۇسىنىستاردى قولدايمىن. دەگەنمەن, نارىقتىڭ ٶز ەرەجەسٸ بار», - دەدٸ مەملەكەت باسشىسى.
وسى ورايدا پرەزيدەنت ناقتى ەكونوميكالىق فاكتورلارعا بايلانىستى قۇرىلىس كومپانييالارى قازٸر ارزان ٷي سالۋعا مٷددەلٸ ەمەس ەكەنٸن اتاپ ٶتتٸ.
«سول سەبەپتٸ قولجەتٸمدٸ ەرٸ ساپالى ٷي سالۋدى جانداندىرۋ ٷشٸن قۇرىلىس كومپانييالارىمەن وففتەيك, ياعني الدىن الا ساتىپ الۋ كەلٸسٸمٸن جاساۋ كەرەك. سوعان سەيكەس, تۇرعىن ٷيلەر «نۇرلى جەر» باعدارلاماسىنداعى باعامەن ساتىپ الىنادى. مۇنداي تەسٸل سىناق جوبالارى اياسىندا الدىن الا پىسىقتالدى. ەندٸ مۇنى بٷكٸل ەل بويىنشا جٷزەگە اسىرعان جٶن. بۇل قادام از ۋاقىتتىڭ ٸشٸندە قۇنى قولجەتٸمدٸ جاڭا تۇرعىن ٷيلەر سالۋعا مٷمكٸندٸك بەرەدٸ», - دەدٸ توقاەۆ.
