اقش سيريياداعى ەسكەرٸن شىعارا باستايدى. بۇل تۋرالى امەريكالىق باسىلىمدار حابارلادى.
اقش قورعانىس سالاسىنىڭ رەسمي ٶكٸلٸ CNN تەلەارناسىنا سيرييا ايماعىنداعى امەريكالىق ەسكەريلەردٸڭ بارلىعى ەلگە ورالاتىنىن ايتقان.
اقش بۇل پروتسەستٸ قاشان باستايتىنى ناقتى بەلگٸسٸز. ەل پرەزيدەنتٸ دونالد ترامپ بولسا, Twitter-دە "يسلام مەملەكەتٸ" ەكسترەميستٸك توبىنىڭ كٷيرەگەنٸن, "اقش ەسكەرٸنٸڭ سيرييادا قالۋىنىڭ جالعىز سەبەبٸ يم-دٸ جەڭۋ بولعانىن" جازدى.
رەسمي دەرەك بويىنشا, سيرييا اۋماعىندا 2000 امەريكالىق ەسكەري بار.
"يسلام مەملەكەتٸ" (قازاقستاندا دايش دەپ اتالادى - رەد.) - 2013 جىلى سيرييا مەن يراك اۋماعىندا قۇرىلعان ەكسترەميستٸك توپ. بٸرنەشە جىل بويى ەكٸ ەل اۋماعىنىڭ نەگٸزگٸ بٶلٸگٸن باسىپ الىپ, حاليفات ورناتپاق بولعان. 2018 جىلدان باستاپ يم قۇلدىراي باستادى. قازاقستاندا تەرروريستٸك ۇيىم دەپ تانىلعان.
قازاقستان ۇلتتىق قاۋٸپسٸزدٸك كوميتەتٸنٸڭ دەرەگٸنشە, 800-گە جۋىق قازاقستاندىق سيريياعا كەتٸپ, "يسلام مەملەكەتٸ" توبىنىڭ ساپىندا سوعىسقان.
