قازاقستاندىق ستۋدەنت توميريس بايسافانىڭ ٶلٸمٸنە قاتىستى داعىستان ٷكٸمەتٸنٸڭ بۇرىنعى باسشىسى مۋحتار مەدجيدوۆتىڭ ۇلى مۋرتۋزالي مەدجيدوۆ قاماۋعا الىندى, دەپ حابارلايدى "ۇلت اقپارات".
«مەسكەۋ قالاسىنىڭ باسمان اۋداندىق سوتىنىڭ قاۋلىسىمەن ايىپتالۋشى مەدجيدوۆ مۋرتۋزالي مۋحتاروۆيچكە قاتىستى 2020 جىلدىڭ 28 قىركٷيەگٸنە دەيٸن قاماۋعا الۋ تۋرالى بۇلتارتپاۋ شاراسى قابىلداندى», - دەپ حابارلايدى تاسس اگەنتتٸگٸ باسمان سوتىنىڭ باسپاسٶز قىزمەتٸنە سٸلتەمە جاساپ.
توميريس بايسافانىڭ اناسى جاننا احمەتوۆا وسى ٸسكە قاتىستى جاڭا دەرەكتەردەن حاباردار بولعانىن مەلٸم ەتتٸ.
«ايعاقتار تابىلىپتى. ول ۇستالدى. بٸراق ٸستٸڭ مەن-جايى ماعان ەلٸ بەلگٸسٸز», - دەگەن اناسى م.مەدجيدوۆتىڭ ۇستالعانى تۋرالى اقپاراتتى مەسكەۋدە راستاعانىن ايتتى.
جاننا احمەتوۆا تەرگەۋ بارىسىمەن بايلانىستا وتىر. كارانتين شارالارى الىنعاننان كەيٸن رەسەي استاناسىنا ۇشىپ بارماق.
ەسكە سالا كەتسەك, 2018 جىلدىڭ سەۋٸر ايىندا قازاقستاندىق ستۋدەنت قىز توميريس بايسافا مەسكەۋ مەملەكەتتٸك حالىقارالىق قاتىناستار ينستيتۋتىنىڭ تەرەزەسٸنەن قۇلاپ كەتكەن ەدٸ.
ول 3 مامىردا اۋرۋحانادا قايتىس بولدى. قىزدىڭ اتا-اناسى ونىڭ ٶزٸنە قول سالعاندىعىنا قاتىستى تەرگەۋدٸڭ نۇسقاسىمەن كەلٸسپەي, تەرگەۋدٸڭ ەدٸل جٷرگٸزٸلۋٸن تالاپ ەتكەن ەدٸ.كەيٸننەن قر ادام قۇقىقتارى جٶنٸندەگٸ ۋەكٸلٸ (ومبۋدسمەن) اسقار شەكٸروۆ رەسەي فەدەراتسيياسىنىڭ ومبۋدسمەنٸ تاتيانا موسكالكوۆاعا توميريس بايسافانىڭ ٶلٸمٸن تەرگەۋگە كٶمەك سۇراعان بولاتىن.
