پرەزيدەنت قاسىم-جومارت توقاەۆ رەفورمالار جٶنٸندەگٸ جوعارى كەڭەستٸڭ وتىرىسىن ٶتكٸزدٸ, دەپ حابارلايدى "ۇلت اقپارات" اقوردانىڭ رەسمي سايتىنا سٸلتەمە جاساپ.
مەملەكەت باسشىسىنىڭ تٶراعالىعىمەن رەفورمالار جٶنٸندەگٸ جوعارى كەڭەستٸڭ كەزەكتٸ وتىرىسى ٶتتٸ. جيىن گەوساياسي جاعدايدىڭ قازاقستانعا تيگٸزەتٸن كەرٸ ەسەرٸنە تٶتەپ بەرۋگە باعىتتالعان قاجەتتٸ شارالار توپتاماسىن تالقىلاۋدان باستالدى.
جيىن بارىسىندا اتالعان مەسەلە بويىنشا پرەمەر-مينيستر ەليحان سمايىلوۆ, ۇلتتىق بانك تٶراعاسى عالىمجان پٸرماتوۆ, پرەزيدەنتتٸڭ ەكونوميكالىق دامۋ مەسەلەلەرٸ جٶنٸندەگٸ شتاتتان تىس كەڭەسشٸسٸ, رەفورمالار جٶنٸندەگٸ كەڭەس تٶراعاسىنىڭ ورىنباسارى سەر سۋما چاكرابارتي جەنە ٷكٸمەت مٷشەلەرٸ بايانداما جاسادى. سونداي-اق «اتامەكەن» ۇلتتىق كەسٸپكەرلەر پالاتاسى پرەزيديۋمىنىڭ تٶراعاسى رايىمبەك باتالوۆ بيزنەس تاراپىنىڭ ۇسىنىستارىن ورتاعا سالدى.
پرەزيدەنتتٸڭ ايتۋىنشا, ٷكٸمەت قۇرعان داعدارىسقا قارسى شارالاردى ٷيلەستٸرۋدٸڭ جەدەل شتابى رەسەيگە سالىنعان سانكتسييالاردىڭ قازاقستاننىڭ ەكونوميكالىق سالالارىنا تيگٸزەتٸن ەسەرٸن جان-جاقتى تالداۋعا, جاعدايدىڭ قالاي ٶربيتٸنٸنە قاراپ شارا قابىلداۋعا, سونداي-اق الداعى ٸس-قيمىلداردىڭ بٸرىڭعاي جوسپارىن جاساۋعا تيٸس. مەملەكەت باسشىسى ٷكٸمەتتٸ بۇل باعىتتا شۇعىل ەرەكەت ەتۋگە جەنە بيزنەس قوعامداستىقپەن تىعىز بايلانىستا جۇمىس ٸستەۋگە شاقىردى.
قاسىم-جومارت توقاەۆ ەكونوميكالىق تالداۋ نەگٸزٸندە كەسٸپورىنداردى, قاجەت بولعان جاعدايدا, حالىقتىڭ جەكەلەگەن توپتارىن قولداۋ شارالارىنىڭ توپتاماسىن دايىنداۋدى تاپسىردى. سونداي-اق بيىلعى رەسپۋبليكالىق بيۋدجەت قايتا قارالدى.
جوعارى كەڭەستٸڭ نەگٸزگٸ وتىرىسى اياسىندا ٷش مەسەلە قاراستىرىلدى. ولار: مەملەكەتتٸك بيۋدجەتتٸڭ كٸرٸس بٶلٸگٸن كٷشەيتۋ, ينۆەستيتسييالىق ساياساتتى جەتٸلدٸرۋ, «سامۇرىق-قازىنا» اكتسيونەرلٸك قوعامىن رەفورمالاۋ.
مەملەكەتتٸك بيۋدجەتتٸڭ كٸرٸس بٶلٸگٸن كٷشەيتۋ جٶنٸندەگٸ بٸرٸنشٸ مەسەلە بويىنشا ۇلتتىق ەكونوميكا مينيسترٸ ەلٸبەك قۋانتىروۆ بايانداما جاسادى. ونىڭ ايتۋىنشا, بيۋدجەتكە تٷسەتٸن قوسىمشا كٸرٸستەردٸ قامتاماسىز ەتۋ ماقساتىمەن قاتتى پايدالى قازبالاردىڭ ٷش تٷرٸنە سالىناتىن پايدالى قازبالار ٶندٸرٸسٸ سالىعىنىڭ مٶلشەرلەمەسٸن ورتاشا ەسەپپەن 3 ەسە ٶسٸرۋ ۇسىنىلادى. بۇل بيۋدجەتكە تٷسەتٸن كٸرٸستٸ 300 ميلليارد تەڭگەگە ارتتىرۋعا مٷمكٸندٸك بەرەدٸ.
مينيستر كاپيتالدى سىرتقا شىعارۋعا جول بەرمەۋ, شەتەلدٸك كومپانييالاردىڭ تابىسىنا جەنە تسيفرلىق ماينينگكە سالىق سالۋ شارالارىن ەنگٸزۋدٸ ۇسىندى. بۇدان بٶلەك مەملەكەتتٸك بيۋدجەتكە تٷسەتٸن قوسىمشا كٸرٸستەر ترانسفەرتتٸك باعا بەلگٸلەۋدٸ قاداعالاۋ شارالارىن, كەدەن مەن سالىق باقىلاۋىن كٷشەيتۋدٸ قامتاماسىز ەتۋگە باعىتتالعان.
قاسىم-جومارت توقاەۆ بايانداما قورىتىندىسى بويىنشا ٷكٸمەتكە, ينۆەستورلىق قوعامداستىقپەن بٸرلەسٸپ, حالىقارالىق سالىق جەنە ترانسفەرتتٸك باعا بەلگٸلەۋ مەسەلەلەرٸن مۇقييات پىسىقتاۋدى تاپسىردى.
سونىمەن قاتار وتىرىستا ينۆەستيتسييالىق ساياساتتىڭ جاڭا تەسٸلدەرٸن قالىپتاستىرۋ مەسەلەسٸ قاراستىرىلدى. ينۆەستيتسييالىق ساياسات تۇجىرىمداماسى اياسىندا ينۆەستيتسييالىق ەكوجٷيەنٸ ودان ەرٸ دامىتۋ, جەكە سەكتوردىڭ ينۆەستيتسييالىق بەلسەندٸلٸگٸنٸڭ ارتۋىنا ىقپال ەتۋ جەنە باعا بەلگٸلەۋدٸڭ جاھاندىق تٸزبەگٸن تەرەڭ ينتەگراتسييالاۋ جۇمىستارىن جٷرگٸزۋ قاراستىرىلعان.
«سامۇرىق-قازىنا» اكتسيونەرلٸك قوعامىن رەفورمالاۋ بارىسى جٶنٸندە باسقارما تٶراعاسى الماسادام سەتقاليەۆ ەسەپ بەردٸ. ول ساتىپ الۋ ٷدەرٸسٸنٸڭ اشىقتىعىن قامتاماسىز ەتۋ, مۇناي, گاز ٶڭدەۋ, كٶمٸر جەنە ەلەكتر قۋاتىن ٶندٸرۋ مەن ولاردىڭ ماركەتينگٸ نارىعىنىڭ قاتىسۋشىلارى ٷشٸن كەدەرگٸلەردٸ جويۋ سيياقتى باعدارلامانىڭ نەگٸزگٸ باسىمدىقتارىن اتاپ ٶتتٸ. سونىمەن بٸرگە كادرلىق ساياسات قايتا قارالىپ, باسقارۋ پەرسونالى وڭتايلاندىرىلعان. «قازمۇنايگاز» اق, «ەير استانا» اق, «KEGOC» اق, «QazaqGaz» اق سيياقتى كومپانييالار IPO-عا شىعارىلادى. سونىڭ ارقاسىندا «سامۇرىق-قازىنا» ۇلتتىق قورعا 500 ميلليارد تەڭگە بٶلە الادى.
باعدارلاما بويىنشا 8 ميلليارد اقش دوللارىنان استام ساپالى ينۆەستيتسييا تارتۋ, جالپى قۇنى 4 تريلليون تەڭگەگە جاڭادان 24 ٶندٸرٸس ورنىن اشۋ جەنە 5000 جاڭا جۇمىس ورنىن اشۋ كٶزدەلۋدە. ەربٸر پورتفەلدٸك كومپانييا ٷشٸن قىزمەتتٸڭ تيٸمدٸلٸگٸن ارتتىرۋ بويىنشا ۇسىنىستار ەزٸرلەنٸپ, جەتكٸزۋ باعدارلارى وڭتايلاندىرىلادى, سونداي-اق سىبايلاس جەمقورلىققا قارسى شارالار قابىلدانادى. مىسالى, قور كەسٸپورىندارىنا ەلەكتر قۋاتىن جەتكٸزۋ ٷدەرٸسٸنە قاتىساتىن 44 دەلدالمەن اراداعى شارتتى بۇزۋ جوسپارلانىپ وتىر. وسى شارالاردان كەيٸن ەكونوميكالىق تيٸمدٸلٸك بيىلدىڭ ٶزٸندە 2 ميلليارد تەڭگەدەن اسادى.
