Prezident Qasym-Jomart Toqaev Reformalar jónindegi joǵary keńestiń otyrysyn ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysynyń tóraǵalyǵymen Reformalar jónindegi joǵary keńestiń kezekti otyrysy ótti. Jiyn geosaiasi jaǵdaidyń Qazaqstanǵa tigizetin keri áserine tótep berýge baǵyttalǵan qajetti sharalar toptamasyn talqylaýdan bastaldy.
Jiyn barysynda atalǵan másele boiynsha Premer-Ministr Álihan Smaiylov, Ulttyq bank tóraǵasy Ǵalymjan Pirmatov, Prezidenttiń ekonomikalyq damý máseleleri jónindegi shtattan tys keńesshisi, Reformalar jónindegi keńes tóraǵasynyń orynbasary Ser Sýma Chakrabarti jáne Úkimet músheleri baiandama jasady. Sondai-aq «Atameken» Ulttyq kásipkerler palatasy prezidiýmynyń tóraǵasy Raiymbek Batalov biznes tarapynyń usynystaryn ortaǵa saldy.
Prezidenttiń aitýynsha, Úkimet qurǵan Daǵdarysqa qarsy sharalardy úilestirýdiń jedel shtaby Reseige salynǵan sanktsiialardyń Qazaqstannyń ekonomikalyq salalaryna tigizetin áserin jan-jaqty taldaýǵa, jaǵdaidyń qalai órbitinine qarap shara qabyldaýǵa, sondai-aq aldaǵy is-qimyldardyń biryńǵai josparyn jasaýǵa tiis. Memleket basshysy Úkimetti bul baǵytta shuǵyl áreket etýge jáne biznes qoǵamdastyqpen tyǵyz bailanysta jumys isteýge shaqyrdy.
Qasym-Jomart Toqaev ekonomikalyq taldaý negizinde kásiporyndardy, qajet bolǵan jaǵdaida, halyqtyń jekelegen toptaryn qoldaý sharalarynyń toptamasyn daiyndaýdy tapsyrdy. Sondai-aq biylǵy respýblikalyq biýdjet qaita qaraldy.
Joǵary keńestiń negizgi otyrysy aiasynda úsh másele qarastyryldy. Olar: memlekettik biýdjettiń kiris bóligin kúsheitý, investitsiialyq saiasatty jetildirý, «Samuryq-Qazyna» aktsionerlik qoǵamyn reformalaý.
Memlekettik biýdjettiń kiris bóligin kúsheitý jónindegi birinshi másele boiynsha Ulttyq ekonomika ministri Álibek Qýantyrov baiandama jasady. Onyń aitýynsha, biýdjetke túsetin qosymsha kiristerdi qamtamasyz etý maqsatymen qatty paidaly qazbalardyń úsh túrine salynatyn paidaly qazbalar óndirisi salyǵynyń mólsherlemesin ortasha eseppen 3 ese ósirý usynylady. Bul biýdjetke túsetin kiristi 300 milliard teńgege arttyrýǵa múmkindik beredi.
Ministr kapitaldy syrtqa shyǵarýǵa jol bermeý, sheteldik kompaniialardyń tabysyna jáne tsifrlyq mainingke salyq salý sharalaryn engizýdi usyndy. Budan bólek memlekettik biýdjetke túsetin qosymsha kirister transferttik baǵa belgileýdi qadaǵalaý sharalaryn, keden men salyq baqylaýyn kúsheitýdi qamtamasyz etýge baǵyttalǵan.
Qasym-Jomart Toqaev baiandama qorytyndysy boiynsha Úkimetke, investorlyq qoǵamdastyqpen birlesip, halyqaralyq salyq jáne transferttik baǵa belgileý máselelerin muqiiat pysyqtaýdy tapsyrdy.
Sonymen qatar otyrysta investitsiialyq saiasattyń jańa tásilderin qalyptastyrý máselesi qarastyryldy. Investitsiialyq saiasat tujyrymdamasy aiasynda investitsiialyq ekojúieni odan ári damytý, jeke sektordyń investitsiialyq belsendiliginiń artýyna yqpal etý jáne baǵa belgileýdiń jahandyq tizbegin tereń integratsiialaý jumystaryn júrgizý qarastyrylǵan.
«Samuryq-Qazyna» aktsionerlik qoǵamyn reformalaý barysy jóninde basqarma tóraǵasy Almasadam Sátqaliev esep berdi. Ol satyp alý úderisiniń ashyqtyǵyn qamtamasyz etý, munai, gaz óńdeý, kómir jáne elektr qýatyn óndirý men olardyń marketingi naryǵynyń qatysýshylary úshin kedergilerdi joiý siiaqty baǵdarlamanyń negizgi basymdyqtaryn atap ótti. Sonymen birge kadrlyq saiasat qaita qaralyp, basqarý personaly ońtailandyrylǵan. «QazMunaiGaz» AQ, «Eir Astana» AQ, «KEGOC» AQ, «QazaqGaz» AQ siiaqty kompaniialar IPO-ǵa shyǵarylady. Sonyń arqasynda «Samuryq-Qazyna» Ulttyq qorǵa 500 milliard teńge bóle alady.
Baǵdarlama boiynsha 8 milliard AQSh dollarynan astam sapaly investitsiia tartý, jalpy quny 4 trillion teńgege jańadan 24 óndiris ornyn ashý jáne 5000 jańa jumys ornyn ashý kózdelýde. Árbir portfeldik kompaniia úshin qyzmettiń tiimdiligin arttyrý boiynsha usynystar ázirlenip, jetkizý baǵdarlary ońtailandyrylady, sondai-aq sybailas jemqorlyqqa qarsy sharalar qabyldanady. Mysaly, qor kásiporyndaryna elektr qýatyn jetkizý úderisine qatysatyn 44 deldalmen aradaǵy shartty buzý josparlanyp otyr. Osy sharalardan keiin ekonomikalyq tiimdilik biyldyń ózinde 2 milliard teńgeden asady.
