قازاقستان پرەزيدەنتٸ «COVID-19 پاندەميياسى تۇسىندا جەنە ودان كەيٸنگٸ كەزەڭدە دامۋدى قارجىلاندىرۋ» اتتى جوعارى دەڭگەيدە ٶتكەن شاراعا قاتىستى, دەپ حابارلايدى "ۇلت اقپارات" اقورداعا سٸلتەمە جاساپ.
بەينە كونفەرەنتسييا فورماتىنداعى فورۋم بۇۇ باس حاتشىسى انتونيۋ گۋتەرريشتٸڭ, كانادا پرەمەر-مينيسترٸ دجاستين تريۋدو مەن يامايكا پرەمەر-مينيسترٸ ەندريۋ حولنەسستٸڭ باستاماسىمەن ٶتتٸ. اتالعان جيىن COVID-19 ٸندەتٸنٸڭ سالدارىن جەڭٸلدەتۋ جەنە داعدارىستان كەيٸنگٸ قايتا قالپىنا كەلتٸرۋ جۇمىستارىنا حالىقارالىق ٸس-قيمىلداردى جۇمىلدىرۋعا ارنالدى.
تەڭٸزگە شىعاتىن جولى جوق دامۋشى ەلدەر توبىنىڭ تٶراعاسى رەتٸندە سٶز سٶيلەگەن قاسىم-جومارت توقاەۆ ەلەمدٸك قوعامداستىقتىڭ نازارىن ٸندەتتٸڭ سالدارىنا اۋدارا وتىرىپ: «پاندەمييا بارلىق مەملەكەتتەردٸڭ دامۋىنا قاۋٸپ تٶندٸردٸ. ەسٸرەسە سىرتقى قارجىلاندىرۋى, ساۋدا جەنە ينۆەستيتسيياسى ازايعان تەڭٸزگە شىعاتىن جولى جوق دامۋشى ەلدەرگە ونىڭ زاردابى كٶبٸرەك تيدٸ», – دەدٸ.
وسى ورايدا مەملەكەت باسشىسى دامۋشى ەلدەردٸڭ سىرتقى قارىزداردى جەنە «تسيفرلىق تەڭسٸزدٸكتٸ» جويۋ, تازا اۋىزسۋعا, جاسىل جەنە زاماناۋي اگروتەحنولوگييالارعا قولجەتٸمدٸلٸكتٸ قامتاماسىز ەتۋ پروبلەمالارىن شەشۋ ٷشٸن حالىقارالىق ٸس-ەرەكەتتەردٸ جۇمىلدىرۋعا شاقىردى.
قاسىم-جومارت توقاەۆ قازاقستاننىڭ «بۇۇ-نىڭ گۋمانيتارلىق كٶمەك كٶرسەتۋدٸڭ جاھاندىق جوسپارىن» ٸسكە اسىرۋعا جەنە كوروناۆيرۋسقا قارسى كٷرەس بارىسىندا بٸرقاتار شەت مەملەكەتكە جاساعان گۋمانيتارلىق قولداۋىن ەرەكشە اتاپ ٶتتٸ. مەملەكەت باسشىسى ەلٸمٸزدٸڭ جاھاندىق ازىق-تٷلٸك قاۋٸپسٸزدٸگٸن قامتاماسىز ەتۋگە, قاقتىعىستاردى رەتتەۋگە جەنە بەيبٸتشٸلٸك ورناتۋعا بەيٸلدٸ ەكەنٸن ناقتىلادى.
فورۋمعا گەرمانييا, فرانتسييا, وڭتٷستٸك افريكا رەسپۋبليكاسى, جاپونييا, يتالييا, ۇلىبريتانييا, پەكٸستان, قىرعىزستان, بەلارۋس, ساۋد ارابيياسى جەنە باسقا دا مەملەكەتتەردٸڭ كٶشباسشىلارى, حالىقارالىق ۆاليۋتا قورى, ەكونوميكالىق ىنتىماقتاستىق جەنە دامۋ ۇيىمى, دٷنيەجٷزٸلٸك بانك جەتەكشٸلەرٸ, سونداي-اق, بٸرقاتار حالىقارالىق قارجى ينستيتۋتىنىڭ باسشىلارى قاتىستى.
