Qazaqstan Prezidenti «COVID-19 pandemiiasy tusynda jáne odan keiingi kezeńde damýdy qarjylandyrý» atty joǵary deńgeide ótken sharaǵa qatysty, dep habarlaidy "Ult aqparat" Aqordaǵa silteme jasap.
Beine konferentsiia formatyndaǵy forým BUU Bas hatshysy Antoniý Gýterrishtiń, Kanada Premer-Ministri Djastin Triýdo men Iamaika Premer-Ministri Endriý Holnesstiń bastamasymen ótti. Atalǵan jiyn COVID-19 indetiniń saldaryn jeńildetý jáne daǵdarystan keiingi qaita qalpyna keltirý jumystaryna halyqaralyq is-qimyldardy jumyldyrýǵa arnaldy.
Teńizge shyǵatyn joly joq damýshy elder tobynyń tóraǵasy retinde sóz sóilegen Qasym-Jomart Toqaev álemdik qoǵamdastyqtyń nazaryn indettiń saldaryna aýdara otyryp: «Pandemiia barlyq memleketterdiń damýyna qaýip tóndirdi. Ásirese syrtqy qarjylandyrýy, saýda jáne investitsiiasy azaiǵan teńizge shyǵatyn joly joq damýshy elderge onyń zardaby kóbirek tidi», – dedi.
Osy oraida Memleket basshysy damýshy elderdiń syrtqy qaryzdardy jáne «tsifrlyq teńsizdikti» joiý, taza aýyzsýǵa, jasyl jáne zamanaýi agrotehnologiialarǵa qoljetimdilikti qamtamasyz etý problemalaryn sheshý úshin halyqaralyq is-áreketterdi jumyldyrýǵa shaqyrdy.
Qasym-Jomart Toqaev Qazaqstannyń «BUU-nyń gýmanitarlyq kómek kórsetýdiń jahandyq josparyn» iske asyrýǵa jáne koronavirýsqa qarsy kúres barysynda birqatar shet memleketke jasaǵan gýmanitarlyq qoldaýyn erekshe atap ótti. Memleket basshysy elimizdiń jahandyq azyq-túlik qaýipsizdigin qamtamasyz etýge, qaqtyǵystardy retteýge jáne beibitshilik ornatýǵa beiildi ekenin naqtylady.
Forýmǵa Germaniia, Frantsiia, Ońtústik Afrika Respýblikasy, Japoniia, Italiia, Ulybritaniia, Pákistan, Qyrǵyzstan, Belarýs, Saýd Arabiiasy jáne basqa da memleketterdiń kóshbasshylary, Halyqaralyq valiýta qory, Ekonomikalyq yntymaqtastyq jáne damý uiymy, Dúniejúzilik bank jetekshileri, sondai-aq, birqatar halyqaralyq qarjy institýtynyń basshylary qatysty.
