پرەزيدەنت قاسىم-جومارت توقاەۆ قازاقستاندىقتاردى قۇربان ايت مەرەكەسٸمەن قۇتتىقتادى, - دەپ حابارلايدى "ۇلت اقپارات" اقورداعا سٸلتەمە جاساپ.
"ارداقتى اعايىن! سٸزدەردٸ كٷللٸ مۇسىلمان قاۋىمى ٷشٸن قاستەرلٸ قۇربان ايت مەرەكەسٸمەن شىن جٷرەكتەن قۇتتىقتايمىن! بۇل - قايىرىمدىلىق پەن جاناشىرلىق, ٸزگٸلٸك پەن يماندىلىق سيياقتى اسىل قاسيەتتەردٸ دەرٸپتەيتٸن ۇلىق مەيرام. سالت-دەستٷرٸمٸزبەن بەرٸك ۇشتاسقان اتا دٸنٸمٸز - ەلدٸڭ رۋحاني تۇتاستىعىن ساقتاۋعا ىقپال ەتەتٸن باستى قۇندىلىقتىڭ بٸرٸ.
قۇربان ايت قاشاندا بارشا جۇرتتى بەرەكە-بٸرلٸككە ٷندەيدٸ. ەل ازاماتتارىن باۋىرمال بولۋعا شاقىرىپ, بٷكٸل حالقىمىزدىڭ ىرىس-ىنتىماعىن ارتتىرادى.
مۇسىلمان بالاسى بۇل كٷندەرٸ وتباسى اماندىعى مەن ەل تىنىشتىعى ٷشٸن قۇرباندىق شالىپ, جوق-جٸتٸككە كٶمەكتەسەدٸ, مۇقتاج جاندارعا قامقورلىق تانىتادى. وسىنداي ٸزگٸ نيەت پەن ساۋاپتى ٸس ەل-جۇرتتىڭ بٸر-بٸرٸمەن ەتەنە ارالاسۋىنا, ٶزارا سىيلاستىق پەن جاقسىلىققا جول اشادى.
قۇربان ايتتىڭ ۇلاعاتى مەن ٶنەگەسٸ بٸزدٸڭ رۋحاني قۇندىلىقتارىمىزبەن ٷندەسەدٸ. بٷگٸنگٸ مەرەكەنٸڭ مەن-ماڭىزى وسىندا دەپ بٸلەمٸن. شالعان قۇرباندىقتارىڭىز, دۇعا-تٸلەكتەرٸڭٸز قابىل بولسىن! ايتتان ايتقا امان-ەسەن جەتە بەرەيٸك!" - دەدٸ مەملەكەت باسشىسى.
