Prezident Qasym-Jomart Toqaev qazaqstandyqtardy Qurban ait merekesimen quttyqtady, - dep habarlaidy "Ult aqparat" Aqordaǵa silteme jasap.
"Ardaqty aǵaiyn! Sizderdi kúlli musylman qaýymy úshin qasterli Qurban ait merekesimen shyn júrekten quttyqtaimyn! Bul - qaiyrymdylyq pen janashyrlyq, izgilik pen imandylyq siiaqty asyl qasietterdi dáripteitin ulyq meiram. Salt-dástúrimizben berik ushtasqan ata dinimiz - eldiń rýhani tutastyǵyn saqtaýǵa yqpal etetin basty qundylyqtyń biri.
Qurban ait qashanda barsha jurtty bereke-birlikke úndeidi. El azamattaryn baýyrmal bolýǵa shaqyryp, búkil halqymyzdyń yrys-yntymaǵyn arttyrady.
Musylman balasy bul kúnderi otbasy amandyǵy men el tynyshtyǵy úshin qurbandyq shalyp, joq-jitikke kómektesedi, muqtaj jandarǵa qamqorlyq tanytady. Osyndai izgi niet pen saýapty is el-jurttyń bir-birimen etene aralasýyna, ózara syilastyq pen jaqsylyqqa jol ashady.
Qurban aittyń ulaǵaty men ónegesi bizdiń rýhani qundylyqtarymyzben úndesedi. Búgingi merekeniń mán-mańyzy osynda dep bilemin. Shalǵan qurbandyqtaryńyz, duǵa-tilekterińiz qabyl bolsyn! Aittan aitqa aman-esen jete bereiik!" - dedi Memleket basshysy.
