مەملەكەت باسشىسى قاسىم-جومارت توقاەۆ قاراعاندى وبلىسىنداعى دالا ٶرتتەرٸن سٶندٸرۋگە قاتىسقان ٶرت سٶندٸرۋشٸلەر مەن ەسكەري قىزمەتشٸلەردٸ «ەرلٸگٸ ٷشٸن» مەدالٸمەن ماراپاتتادى. بۇل تۋرالى قر تٶتەنشە جاعدايلار مينيسترلٸگٸنٸڭ باسپاسٶز قىزمەتٸنەن مەلٸم ەتتٸ, دەپ حابارلايدى "ۇلت اقپارات".
بٷگٸن قر تٶتەنشە جاعدايلار مينيسترلٸگٸندە قاراعاندى وبلىستىق تٶتەنشە جاعدايلار دەپارتامەنتٸنٸڭ ٶرت سٶندٸرۋشٸلەرٸ مەن 52859 ەسكەري بٶلٸمٸنٸڭ ەسكەري قىزمەتشٸلەرٸن سالتاناتتى ماراپاتتاۋ شاراسى ٶتتٸ. ولار بيىلعى شٸلدە ايىنىڭ باسىندا قاراعاندى وبلىسىندا تۇتانعان دالا ٶرتتەرٸنٸڭ جاقىن ماڭداعى ەلدٸ مەكەندەرگە تارالۋىنىڭ الدىن الدى.
تٶتەنشە جاعدايلار مينيسترٸ يۋريي يلين پرەزيدەنت قاسىم-جومارت توقاەۆتىڭ اتىنان باۋىرجان بٸلەلوۆكە, ۇلان كەڭەسكە, ۆلاديمير ماليۋتينگە, اياتوللا نەبيەۆكە «ەرلٸگٸ ٷشٸن» مەدالدارىن, سونداي-اق قازىبەك ەمٸربەكوۆكە, بولات ورازبەكوۆكە, مەدي رٷستەمگە, ەرجان سۇلتانبەكوۆكە قۇرمەت گراموتالارىن تابىستادى.
«بٸزدٸڭ قۇتقارۋشىلار دالا ٶرتتەرٸن سٶندٸرۋگە اتسالىسقان قاتىسۋشىلارمەن بٸرگە بايقوڭىر, العاباس, تٷيەمويناق, پيونەر, اقتاس, قۇلىمبەك, مالشىباي ەلدٸ مەكەندەرٸن قورعاپ, وتتىڭ قارقىندى تارالۋىن بولدىرمادى. بارلىعى جۇمىلا كەلە ورتاق كٷش-جٸگەرمەن 40 500 گەكتاردان استام دالا ٶرتٸن جويدى.
مينيستر ماراپاتتالۋشىلارعا اۋىل شارۋاشىلىعى القاپتارىن ساقتاپ, ەلدٸ مەكەندەردٸ اۋقىمدى اپاتتان قۇتقارۋداعى كٶرسەتكەن باتىرلىعى مەن جوعارى كەسٸبي بٸلٸكتٸلٸگٸ ٷشٸن العىس ايتتى.
ماراپاتتاۋ رەسٸمٸنەن كەيٸن قاراعاندى وبلىسىنىڭ ٶرت سٶندٸرۋشٸلەرٸ مەن ەسكەري قىزمەتشٸلەرٸ ٷشٸن قر ۇلتتىق مۋزەيٸندە جەنە №4 مامانداندىرىلعان ٶرت سٶندٸرۋ بٶلٸمٸندە ەكسكۋرسييا ٶتكٸزٸلدٸ», - دەدٸ قر تجم باسپاسٶز قىزمەتٸنٸڭ رەسمي ٶكٸلٸ تالعات ۋەلي.
