Memleket basshysy Qasym-Jomart Toqaev Qaraǵandy oblysyndaǵy dala órtterin sóndirýge qatysqan órt sóndirýshiler men áskeri qyzmetshilerdi «Erligi úshin» medalimen marapattady. Bul týraly QR Tótenshe jaǵdailar ministrliginiń baspasóz qyzmetinen málim etti, dep habarlaidy "Ult aqparat".
Búgin QR Tótenshe jaǵdailar ministrliginde Qaraǵandy oblystyq Tótenshe jaǵdailar departamentiniń órt sóndirýshileri men 52859 áskeri bóliminiń áskeri qyzmetshilerin saltanatty marapattaý sharasy ótti. Olar biylǵy shilde aiynyń basynda Qaraǵandy oblysynda tutanǵan dala órtteriniń jaqyn mańdaǵy eldi mekenderge taralýynyń aldyn aldy.
Tótenshe jaǵdailar ministri Iýrii Ilin Prezident Qasym-Jomart Toqaevtyń atynan Baýyrjan Bilálovke, Ulan Keńeske, Vladimir Maliýtinge, Aiatolla Nábievke «Erligi úshin» medaldaryn, sondai-aq Qazybek Ámirbekovke, Bolat Orazbekovke, Mádi Rústemge, Erjan Sultanbekovke Qurmet gramotalaryn tabystady.
«Bizdiń qutqarýshylar dala órtterin sóndirýge atsalysqan qatysýshylarmen birge Baiqońyr, Alǵabas, Túiemoinaq, Pioner, Aqtas, Qulymbek, Malshybai eldi mekenderin qorǵap, ottyń qarqyndy taralýyn boldyrmady. Barlyǵy jumyla kele ortaq kúsh-jigermen 40 500 gektardan astam dala órtin joidy.
Ministr marapattalýshylarǵa aýyl sharýashylyǵy alqaptaryn saqtap, eldi mekenderdi aýqymdy apattan qutqarýdaǵy kórsetken batyrlyǵy men joǵary kásibi biliktiligi úshin alǵys aitty.
Marapattaý rásiminen keiin Qaraǵandy oblysynyń órt sóndirýshileri men áskeri qyzmetshileri úshin QR Ulttyq mýzeiinde jáne №4 mamandandyrylǵan órt sóndirý bóliminde ekskýrsiia ótkizildi», - dedi QR TJM baspasóz qyzmetiniń resmi ókili Talǵat Ýáli.
