ۇلىتاۋ وبلىسىندا جول قوزعالىسى ەرەجەلەرٸن ٶرەسكەل بۇزعان ٷيلەنۋ كورتەجٸنە قاتىستى داۋلى وقيعادان كەيٸن سوت شەشٸمٸ شىقتى. قۇقىق بۇزۋشىلىق جاساعانداردىڭ بٸرٸ – «قازاقستان ستۋدەنتتەرٸ اليانسىنىڭ» 24 جاستاعى جەتەكشٸسٸ ەرٸ ستۋدەنتتٸك ومبۋدسمەن ەكٸمشٸلٸك قاماۋعا الىندى, دەپ حابارلايدى ult.kz.
قاراجال قالالىق سوتى ازاماتتى ۇساق بۇزاقىلىق جاساعانى ٷشٸن كٸنەلٸ دەپ تانىپ, وعان 10 تەۋلٸككە ەكٸمشٸلٸك قاماۋ جازاسىن تاعايىندادى.
ۇلىتاۋ وبلىستىق سوتىنىڭ مەلٸمەتٸنشە, سوت ٸستٸڭ بارلىق مەن-جايىن قاراستىرىپ, 20 اەك كٶلەمٸندەگٸ ايىپپۇل بۇل جاعدايدا جەتكٸلٸكسٸز دەگەن قورىتىندىعا كەلگەن.
وقيعا ەلەۋمەتتٸك جەلٸلەردە تاراعان ٷيلەنۋ كورتەجٸنٸڭ بەينەجازباسىنان كەيٸن قوعام نازارىن اۋدارعان. كادرلاردا بٸرنەشە كٶلٸكتٸڭ جول قوزعالىسى ەرەجەلەرٸن ٶرەسكەل بۇزعانى بايقالعان.
بەينەجازبانى كورتەجگە قاتىسۋشىلاردىڭ بٸرٸ تٷسٸرگەن. وندا ونىڭ جول تالعامايتىن كٶلٸكتٸڭ ليۋگٸنەن شىعىپ, سمارتفون ارقىلى كٶلٸكتەردٸڭ قوزعالىسىن تٷسٸرٸپ تۇرعانى كٶرٸنەدٸ. كەيٸن ۆيدەو Instagram جەلٸسٸندە جارييالانىپ, كٶپشٸلٸك اراسىندا كەڭ تاراعان.
وسى دەرەك بويىنشا ۇلىتاۋ وبلىسىنىڭ پوليتسييا دەپارتامەنتٸ تەكسەرۋ جٷرگٸزدٸ. نەتيجەسٸندە زاڭ بۇزعان جٷرگٸزۋشٸلەرگە قاتىستى شارالار قابىلدانىپ, بٸرنەشە كٶلٸك ايىپ تۇراعىنا قويىلدى. جالپى 22 ەكٸمشٸلٸك حاتتاما تولتىرىلىپ, بەس جٷرگٸزۋشٸ كٶلٸك باسقارۋ قۇقىعىنان ايىرىلدى.
سوت بارىسىندا ايىپتالۋشى ٶز كٸنەسٸن تولىق مويىنداپ, جاساعان ەرەكەتٸنە ٶكٸنٸش بٸلدٸردٸ.
سوت شەشٸمٸمەن وعان ۇساق بۇزاقىلىق جاساعانى ٷشٸن 10 تەۋلٸك ەكٸمشٸلٸك قاماۋ جازاسى تاعايىندالدى.
