ەلٸشەر ناۋاي – تٷركٸ ەلەمٸندەگٸ پارسى تٸلٸنٸڭ ەدەبي ٷستەمدٸگٸن ىعىستىرعان ٸرٸ تۇلعا. ەلورداداعى ۇلتتىق اكادەمييالىق كٸتاپحانادا ٶتٸپ جاتقان «شىعىستىڭ شوقجۇلدىزدارى» اتتى حالىقارالىق كونفەرەنتسييادا قر پارلامەنتٸ مەجٸلٸسٸنٸڭ دەپۋتاتى, فيلولوگييا عىلىمدارىنىڭ دوكتورى ساۋىتبەك ابدراحمانوۆ وسىنداي وي ايتتى, دەپ حابارلايدى قازاقپارات تٸلشٸسٸ.
مەجٸلٸس دەپۋتاتى سٶز بارىسىندا قازاقستان تەۋەلسٸزدٸك الماي تۇرعان شاقتا تٷركيياداعى يۋنۋس ەمرەنٸڭ مەرەيتويىنا بارىپ, باۋىرلاس ەلدەردٸڭ مەدەنيەتٸ الشاقتاپ كەتكەنٸنە قىنجىلىپ ورالعانىن ەسكە الدى. ايتۋىنشا, ازاتتىقتىڭ ارقاسىندا ۋاقىتقا كەتكەن سول ەسە قازٸر قايتىپ وتىر.
«2021 جىل ەزەربايجاندا نيزامي جىلى دەپ جارييالاندى. ەزەربايجان باۋىرلار وسى نيزامي جىلىنا ٷلكەن تابىسپەن كەلدٸ. ەكٸنشٸ قاراباق سوعىسى جەڭٸسپەن اياقتالىپ, نيزاميدٸڭ تۋعان قالاسى گيانجٸ ازات ەتٸلٸپ, نيزامي جىلى سول شاھاردا تويلاندى. بۇل بەرٸمٸز ٷشٸن ٷلكەن قۋانىش.
نيازميدٸڭ قازاق پوەزيياسىنا, سونىڭ ٸشٸندە ابايعا قانداي ىقپال جاساعانىن ايتپاي كەتۋگە بولمايدى. اباي «ەسكەندٸر» پوەماسىن نيزاميدٸڭ ٷلگٸسٸ بويىنشا جازعان», - دەدٸ عالىم.
سونداي-اق ول نيزامي مۇراسى ۇلى اقىن ەلٸشەر ناۋايدٸڭ قالىپتاسۋىنا دا ىقپال ەتكەنٸن اتادى.
«ناۋاي نيزاميدٸڭ ٷلگٸسٸندە بەس داستان جازىپ شىققان. ناۋايدٸڭ ۇلى ەڭبەگٸ – پارسى تٸلٸنٸڭ باسىمدىعىن ىعىستىرىپ, تٷركٸ تٸلٸندە دە جىر تولعاۋعا بولاتىنىن, تٷركٸ تٸلٸنٸڭ پوەزييالىق كەرەمەت كەمەلدٸگٸن العاش رەت اشىپ كٶرسەتتٸ. وسىنداي ەرلٸكتٸ كەيٸن پۋشكين دە قايتالادى», - دەدٸ دەپۋتات.
ساۋىتبەك ابدراحمانوۆ قازٸرگٸ گەوساياسي جاعداي ۋشىعىپ تۇرعان زاماندا تٷركٸ مەملەكەتتەرٸنٸڭ حالىقارالىق ۇيىم اياسىندا توپتاسۋى سەتٸمەن كەلگەن ٸس ەكەنٸن اتاپ ٶتتٸ.
«دٷنيە تاعى دا دٷبٸرلەپ تۇر. كەڭەس وداعى ىدىراپ, سوتسياليستٸك لاگەر تاراعاننان كەيٸن ازداعان جىلدار ٸشٸندە بٸر پوليارلى بولۋعا بەت الىپ كٶرگەن ەلەم قايتادان بيپوليارلى بولۋعا اينالىپ بارادى. قىرعي-قاباق سوعىس قاتەرٸ تٶنە باستاعانىن بەرٸمٸز بايقاپ وتىرمىز. وسىنداي كٷردەلٸ كەزەڭدە ەلەمدەگٸ كٷشتەردٸڭ بالانسى قايتادان سالماقتالا باستاعان شاقتا دٸنٸ بٸر, تٸلٸ بٸر تٷركٸ ەلەمٸنٸڭ تۇتاستىعى قاي كەزدەگٸدەن دە ماڭىزدى ەكەنٸن ايتۋدىڭ ٶزٸ ارتىق.
تٷركٸ كەڭەسٸنٸڭ تٷركٸ تٸلدەس مەملەكەتتەردٸ بٸرٸكتٸرەتٸن حالىقارالىق ۇيىمعا اينالۋى ۋاقىت العا قويىپ وتىرعان سىن-قاتەرلەرگە لايىقتى جاۋاپ بەرۋدٸڭ ٸرٸ تالپىنىسى دەپ بٸلەمٸز. تٷركٸ مەملەكەتتەرٸ ۇيىمنىڭ ٶمٸرشەڭدٸگٸنٸڭ باستى كەپٸلدەرٸنٸڭ بٸرٸ – دٸن ورتاقتىعىنىڭ, تٸل ورتاقتىعىنىڭ دٸل ورتاقتىعىنا ۇلاسۋى. بۇل ٸستە, ەرينە, مەدەنيەتتٸڭ الار ورنى بٶلەكشە. جالپى جاقسى كٶرۋ جاقسى بٸلۋدەن باستالادى. جاقسى بٸلۋ جاقىن تانىسۋدان باستالادى. جاقىن تانىسۋ اۋدارمادان باستالادى. سوندىقتان بٷگٸنگٸ ٸس-شارانى حالىقارالىق تٷركٸ اكادەميياسىنىڭ «شىعىستىڭ شوقجۇلدىزدارىن» جارقىراتا كٶرسەتۋ عانا ەمەس, تٷركٸ تۇتاستىعىنا سەپتەسەتٸن ناقتى قادام دەپ باعالاۋعا بولادى», - دەدٸ ول.
