قازاقستان تەڭگەسٸ سوڭعى ۋاقىتتا نىعايىپ, ايىرباستاۋ ورىندارىندا اقش دوللارىنىڭ ساتىپ الۋ باعامى 450 تەڭگەدەن تٶمەندەدٸ. وسىعان بايلانىستى دوللاردىڭ 400 تەڭگەگە دەيٸن ارزانداۋى مٷمكٸن بە دەگەن سۇراق تۋىندادى, دەپ حابارلايدى ult.kz.
قازاقستاندىق ەكونوميست الماس چۋكيننٸڭ پٸكٸرٸنشە, دوللار باعامىنىڭ 400 تەڭگەدەن تٶمەندەۋٸ ەكٸتالاي.
تەڭگەنٸڭ نىعايۋىنا بٸرنەشە فاكتور ەسەر ەتٸپ وتىر. ولاردىڭ قاتارىندا ۇلتتىق بانكتٸڭ قاتاڭ اقشا-نەسيە ساياساتى, مۇناي باعاسىنىڭ جوعارى بولۋى جەنە سىرتقى نارىقتاعى جاعداي بار.
ۇلتتىق بانك بازالىق مٶلشەرلەمە مەن رەتتەۋ تەتٸكتەرٸ ارقىلى نارىقتاعى ارتىق ٶتٸمدٸلٸكتٸ شەكتەپ وتىر. ال مۇناي باعاسىنىڭ باررەلٸنە 100 دوللاردان اسۋى قازاقستان ەكونوميكاسى مەن ۇلتتىق ۆاليۋتاعا قوسىمشا قولداۋ كٶرسەتۋدە. بۇعان قوسا, كاپيتالدىڭ نارىققا كەلۋٸ دە تەڭگە باعامىنا وڭ ەسەر ەتۋدە.
الايدا ساراپشى قازٸرگٸ تەڭگە باعامىن تىم جوعارى دەپ باعالايدى. ونىڭ ايتۋىنشا, ۇزاق مەرزٸمدٸ پەرسپەكتيۆادا ۇلتتىق ۆاليۋتا بٸرتٸندەپ ەلسٸرەۋٸ مٷمكٸن.
بۇعان مەملەكەتتٸك شىعىنداردىڭ ارتۋى ەسەر ەتەدٸ. الداعى ۋاقىتتا ۇلتتىق قوردان قاراجات الۋ, ٸرٸ ينفراقۇرىلىمدىق جەنە قۇرىلىس جوبالارىن بەلسەندٸ جٷزەگە اسىرۋ اقشا ماسساسى مەن جالاقىنىڭ ٶسۋٸنە ەكەلۋٸ مٷمكٸن. ەگەر بۇل ٷدەرٸس تۇتىنۋ تاۋارلارى كٶلەمٸنٸڭ سەيكەسٸنشە ارتۋىمەن قاتار جٷرمەسە, ينفلياتسييالىق قىسىم كٷشەيەدٸ.
ەكونوميستتٸڭ بولجامىنشا, الداعى بٸر جىلدا ماۋسىمدىق اۋىتقۋلاردى ەسكەرگەندە, دوللار باعامى 470–490 تەڭگە ارالىعىندا تۇراقتانۋى مٷمكٸن.
