جامبىل وبلىسى بايزاق اۋدانىنداعى ەسكەري بٶلٸمنٸڭ وق-دەرٸ قويماسىندا بولعان جارىلىستىڭ سەبەبٸ قازان ايىندا بەلگٸلٸ بولادى. بۇل تۋرالى «حابار» تەلەارناسىنىڭ «ۇلتتىق مٷددە» باعدارلاماسىنا سۇحبات بەرگەن قر تٶتەنشە جاعدايلار مينيسترٸ يۋريي يلين ايتتى, دەپ حابارلايدى قازاقپارات.
«تارازدا ورىن العان قايعىلى وقيعاعا بايلانىستى قازٸرگٸ ۋاقىتتا تەرگەۋ ورگاندارى جۇمىسىن جالعاستىرىپ جاتىر. ٶتكەن اپتادا عانا مەملەكەت باسشىسىنىڭ تاپسىرماسىمەن جۇمىس ساپارىن جاساپ, قازا تاپقانداردىڭ وتباسىلارىنا وردەن تاپسىردىم. بٷگٸندە جەكە قۇرامنان قازا تاپقانداردىڭ جالپى سانى - 10 ادام. سول جارىلىستىڭ سالدارىنان 49 مامانىمىز زارداپ شەكتٸ, ولاردىڭ ٸشٸندە ەكەۋٸنە ٶتە كٷردەلٸ ەم-دوم قاجەت, ال قالعاندارى تٷرلٸ دەڭگەيدە جاراقات الدى. قورعانىس مينيسترلٸگٸنٸڭ دە قىزمەتكەرلەرٸ قاتارىنان قازا تاپقاندار بار. قازٸرگٸ ۋاقىتتا قورعانىس مينيسترلٸگٸنٸڭ ٸز-تٷزسٸز جوعالعان قىزمەتكەرٸن قوسپاعاندا قازا تاپقاندار 17 ادامعا جەتٸپ وتىر.
ال جارىلىستىڭ نەدەن شىققانىن تەرگەۋ انىقتاي جاتار. قالاي دەسەك تە, بٷگٸندە قولىمىزداعى اقپاراتقا سەيكەس, تەرگەۋ ورگاندارى تٷرلٸ نۇسقالارعا قاتىستى جان-جاقتى جۇمىس ٸستەپ جاتىر. بۇل ٶزدٸگٸنەن جانۋ, قاساقانا ٶرتەپ جٸبەرۋ بولۋى مٷمكٸن. سوندىقتان ۋاقىت تا, كٷتۋ دە قاجەت.
تۋعان-تۋىستارى دا «قاۋٸپ-قاتەر بولعان كەزدە نەگە جٸبەردٸڭٸزدەر?» دەپ سۇراپ جاتىر. «وفيتسەرلەر» دەگەن فيلمدە ايتىلعانداي, وتاندى قورعاۋ دەگەن ماماندىق بار ەكەندٸگٸن ەسكە سالامىن. بۇل بٸزدٸڭ ماماندىعىمىزعا دا قاتىستى. قۇتقارۋشىلار تٶتەنشە جاعدايدى كٶرگەن كەزدە ٶزدەرٸنٸڭ كەسٸبي مٸندەتتەرٸن سوڭىنا دەيٸن ورىنداۋى تيٸس», - دەدٸ مينيستر.
ۆەدومستۆو باسشىسىنىڭ اتاپ ٶتۋٸنشە, بايزاق اۋدانىنداعى ەسكەري وق-دەرٸ قويماسىندا جارىلىس بولعان كەزدە وقيعا ورنىنا جەتكەن بٸرٸنشٸ ٶرت سٶندٸرۋ بٶلٸمشەسٸ نىسان باسشىلىعىنان قانداي تەۋەكەلدٸڭ بار ەكەندٸگٸن سۇراعان. قويمادا تراتيل بار ەكەندٸگٸ, ٶزگە جارىلعىش زاتتىڭ جوق ەكەندٸگٸ ايتىلعان. سوندىقتان دا ٶرت سٶندٸرۋشٸلەر قىزىل جالىنمەن كٷرەسكە كٸرٸسكەن.
«تراتيل فيزيكالىق قاسيەتٸ جاعىنان تۇتاندىرعىشسىز جارىلمايدى. ول تەك جانىپ قانا كەتۋٸ تيٸس. بەينەباقىلاۋ كامەرالاردان دا وسىنداي جايتتىڭ ورىن العانىن, اتالعان قويماداعى تراتيلدٸڭ قاتتى جانعانىن بايقاۋعا بولادى. بٸراق, تٷپتەپ كەلگەندە جارىلىس ورىن الدى. مەنٸڭشە, قازان ايىندا جارىلىستىڭ قانداي دا بٸر نەتيجەسٸ بەلگٸلٸ بولادى», - دەدٸ يۋريي يلين.
