Jambyl oblysy Baizaq aýdanyndaǵy áskeri bólimniń oq-dári qoimasynda bolǵan jarylystyń sebebi qazan aiynda belgili bolady. Bul týraly «Habar» telearnasynyń «Ulttyq múdde» baǵdarlamasyna suhbat bergen QR Tótenshe jaǵdailar ministri Iýrii Ilin aitty, dep habarlaidy QazAqparat.
«Tarazda oryn alǵan qaiǵyly oqiǵaǵa bailanysty qazirgi ýaqytta tergeý organdary jumysyn jalǵastyryp jatyr. Ótken aptada ǵana Memleket basshysynyń tapsyrmasymen jumys saparyn jasap, qaza tapqandardyń otbasylaryna orden tapsyrdym. Búginde jeke quramnan qaza tapqandardyń jalpy sany - 10 adam. Sol jarylystyń saldarynan 49 mamanymyz zardap shekti, olardyń ishinde ekeýine óte kúrdeli em-dom qajet, al qalǵandary túrli deńgeide jaraqat aldy. Qorǵanys ministrliginiń de qyzmetkerleri qatarynan qaza tapqandar bar. Qazirgi ýaqytta Qorǵanys ministrliginiń iz-túzsiz joǵalǵan qyzmetkerin qospaǵanda qaza tapqandar 17 adamǵa jetip otyr.
Al jarylystyń neden shyqqanyn tergeý anyqtai jatar. Qalai desek te, búginde qolymyzdaǵy aqparatqa sáikes, tergeý organdary túrli nusqalarǵa qatysty jan-jaqty jumys istep jatyr. Bul ózdiginen janý, qasaqana órtep jiberý bolýy múmkin. Sondyqtan ýaqyt ta, kútý de qajet.
Týǵan-týystary da «qaýip-qater bolǵan kezde nege jiberdińizder?» dep surap jatyr. «Ofitserler» degen filmde aitylǵandai, Otandy qorǵaý degen mamandyq bar ekendigin eske salamyn. Bul bizdiń mamandyǵymyzǵa da qatysty. Qutqarýshylar tótenshe jaǵdaidy kórgen kezde ózderiniń kásibi mindetterin sońyna deiin oryndaýy tiis», - dedi ministr.
Vedomstvo basshysynyń atap ótýinshe, Baizaq aýdanyndaǵy áskeri oq-dári qoimasynda jarylys bolǵan kezde oqiǵa ornyna jetken birinshi órt sóndirý bólimshesi nysan basshylyǵynan qandai táýekeldiń bar ekendigin suraǵan. Qoimada tratil bar ekendigi, ózge jarylǵysh zattyń joq ekendigi aitylǵan. Sondyqtan da órt sóndirýshiler qyzyl jalynmen kúreske kirisken.
«Tratil fizikalyq qasieti jaǵynan tutandyrǵyshsyz jarylmaidy. Ol tek janyp qana ketýi tiis. Beinebaqylaý kameralardan da osyndai jaittyń oryn alǵanyn, atalǵan qoimadaǵy tratildiń qatty janǵanyn baiqaýǵa bolady. Biraq, túptep kelgende jarylys oryn aldy. Menińshe, qazan aiynda jarylystyń qandai da bir nátijesi belgili bolady», - dedi Iýrii Ilin.
