اۋعان ۇشقىشتارى مەن بوسقىندار مٸنگەن ۇشاق 10 قاراشادا دۋشانبەدەن ۇشىپ كەتتٸ. وسىعان دەيٸن اقش-تىڭ تەجٸكستانداعى ەلشٸلٸگٸ 191 اۋعان ازاماتىنىڭ (اراسىندا 143 ۇشقىش بار) اقش-قا قونىستانۋعا دايىن ەكەنٸن حابارلاعان. ولار تەجٸكستاندا ٷش اي تۇرعان, دەپ جازادى ازاتتىق.
اقش ٷكٸمەتٸ ۇيىمداستىرعان رەيس دۋشانبەدەن 10 قاراشادا جەرگٸلٸكتٸ ۋاقىت بويىنشا تٷنگٸ ساعات 12.30-دا ۇشىپ شىققان. ۇشقىشتار مەن اقش-تىڭ تەجٸكستانداعى ەلشٸلٸگٸ ٶكٸلدەرٸنٸڭ سٶزٸنە قاراعاندا, رەيس 10 قاراشادا نەمەسە الداعى كٷندەرٸ دٸتتەگەن ورىنعا جەتۋٸ مٷمكٸن.
ۇشقىشتار اراسىندا ەكٸ ەيەل بار, بٸرٸنٸڭ اياعى اۋىر. "اقش ەلشٸلٸگٸ ولاردى تەجٸكستاننان تەزٸرەك الىپ كەتۋگە كٷش سالىپ جاتىر" دەگەن ەدٸ بۇعان دەيٸن ەلشٸلٸك ٶكٸلدەرٸ.
تامىز ايىندا تەلٸپتەر كابۋلدى باسىپ العان كەزدە اۋعان ەۋە كٷشتەرٸنٸڭ ۇشقىشتارى ەسكەري ۇشاقپەن تەجٸكستانعا قاشقان. اقش-تا دايىندىقتان ٶتكەن اعىلشىنشا سٶيلەيتٸن ۇشقىشتار قۇجاتتارى دايىن بولعانشا وسى ۋاقىت بويى دۋشانبە ماڭىنداعى شيپاجايدى پانالاعاپ كەلگەن ەدٸ.
