«تاليبان» راديكالدى يسلامشىل قوزعالىسىنىڭ اۋعانستان استاناسى كابۋلعا كٸرٸپ, بيلٸكتٸ قايتا قولعا العانىنا بەس جىل تولعانىن تويلاپ جاتىر, دەپ حابارلايدى ult.kz.
Euronews باسىلىمىنىڭ مەلٸمەتٸنشە, كابۋلدى قايتا باسىپ العانىنا بەس جىل تولعان تەلٸپتەر بيلٸگٸ ەلەمدەگٸ ەڭ قاتاڭ رەجيمدەردٸڭ بٸرٸ رەتٸندە سىنعا ۇشىراپ وتىر.
2021 جىلعى وقيعالار ەلدەگٸ جيىرما جىلعا جۋىق حالىقارالىق ەسكەري قاتىسۋدىڭ اياقتالۋىنا جول اشقانىمەن, سودان بەرٸ اۋعانستانداعى ادام قۇقىقتارىنىڭ جاعدايى حالىقارالىق قاۋىمداستىقتىڭ باستى الاڭداۋشىلىقتارىنىڭ بٸرٸنە اينالدى.
تاليبان بيلٸككە قايتا كەلگەننەن كەيٸن بٸرقاتار ازاماتتىق قۇقىقتار شەكتەلٸپ, ەسٸرەسە ەيەلدەر مەن قىزداردىڭ جاعدايى كٷرت قيىندادى. يۋنەسكو مەلٸمەتٸنشە, شامامەن 2,5 ميلليون اۋعان قىزى ورتا مەكتەپ پەن جوعارى بٸلٸم الۋ مٷمكٸندٸگٸنەن ايىرىلعان.
ەيەلدەر ٷشٸن قوعامدىق ٶمٸرگە قاتىسۋعا دا كٶپتەگەن شەكتەۋ ەنگٸزٸلگەن. ولاردىڭ بٸلٸم الۋىنا, سپورتپەن اينالىسۋىنا جەنە بٸرقاتار سالادا جۇمىس ٸستەۋٸنە تىيىم سالىنعان. سونىمەن قاتار ەيەلدەردٸڭ قوعامدىق ورىندارعا شىعۋىنا قاتىستى دا قاتاڭ تالاپتار قويىلعان.
«بۇۇ-ەيەلدەر» ۇيىمىنىڭ مەلٸمەتٸنشە, اۋعان ەيەلدەرٸنٸڭ شامامەن جارتىسى بٷگٸندە ٷيٸنەن ايىنا بٸر-ەكٸ رەت قانا شىعادى. تەلٸپتەر ەنگٸزٸلگەن شەكتەۋلەردٸ ٶزدەرٸنٸڭ شاريعاتتى تٷسٸندٸرۋٸمەن بايلانىستىرادى.
حالىقارالىق دەڭگەيدە «تاليبان» بٸرقاتار ازييا جەنە تاياۋ شىعىس ەلدەرٸمەن بايلانىس ورناتقان. قوزعالىستى اۋعانستاننىڭ زاڭدى ٷكٸمەتٸ رەتٸندە رەسمي مويىنداعان العاشقى ەل – رەسەي.
تەلٸپتەرمەن بايلانىس ورناتۋ مەسەلەسٸ حالىقارالىق قاۋىمداستىق اراسىندا پٸكٸرتالاس تۋدىرىپ وتىر. جاقىندا بريۋسسەلدە ەۋروپالىق وداق ٶكٸلدەرٸ مەن «تاليبان» مٷشەلەرٸ اۋعان ميگرانتتارىن ەلگە قايتارۋ مەسەلەسٸن تالقىلاعان تەحنيكالىق كەزدەسۋ ٶتكٸزدٸ. بۇل قادام قۇقىق قورعاۋ ۇيىمدارىنىڭ سىنىنا ۇشىرادى.
بۇۇ-نىڭ جيىرمادان استام تەۋەلسٸز ساراپشىسى ەلەم ەلدەرٸن «تاليبانمەن» قارىم-قاتىناستى قالىپقا كەلتٸرۋگە اسىقپاۋعا شاقىردى. ساراپشىلار كەز كەلگەن ديپلوماتييالىق نەمەسە ساياسي قادامدى ادام قۇقىقتارى سالاسىنداعى, ەسٸرەسە ەيەلدەر مەن قىزداردىڭ قۇقىقتارىن قورعاۋعا قاتىستى ناقتى ەرٸ تەۋەلسٸز راستالعان ٶزگەرٸستەرمەن بايلانىستىرۋ قاجەت ەكەنٸن اتاپ ٶتتٸ.
وسىلايشا, كابۋلدىڭ تەلٸپتەر باقىلاۋىنا قايتا ٶتكەنٸنە بەس جىل تولعان تۇستا اۋعانستان حالىقارالىق وقشاۋلانۋ, ادام قۇقىقتارىنىڭ شەكتەلۋٸ جەنە ەيەلدەردٸڭ قوعامدىق ٶمٸردەن ىعىستىرىلۋى مەسەلەلەرٸمەن بەتپە-بەت كەلٸپ وتىر.
