تالدىقورعاندا 27 جىل بويى قاڭىراپ تۇرعان عيمارات پايدالانۋعا بەرٸلدٸ. ٶتكەن جىلى نىسانعا 2,3 ملرد تەڭگە قاراجات وبلىستىق بيۋدجەتتەن بٶلٸنٸپ, العاشقىدا قوناق ٷي بولىپ سالىنعان نىسان ستۋدەنتتەر جاتاقحاناسى رەتٸندە ٶزگەرتٸلدٸ, دەپ حابارلايدى "ۇلت اقپارات".
تالدىقورعان قالاسىنىڭ «قاراتال» شاعىن اۋدانىندا ۇزاق جىلدار بويى قاراۋسىز قالعان اياقسىز قۇرىلىستى وبلىس ەكٸمٸ ا. باتالوۆ كوممۋنالدىق مەنشٸككە ٶتكٸزٸپ, ستۋدەنتتەر جاتاقحاناسى رەتٸندە قايتا سالۋدى تاپسىرعان بولاتىن. سونىڭ نەتيجەسٸندە اينالاسى بٸر جىلدىڭ ٸشٸندە 13 قاباتتى, سەۋلەتٸ كەلٸستٸ جاڭا جاتاقحانا بوي كٶتەردٸ. تالدىقورعانداعى بٸردەن بٸر جوعارى وقۋ ورنى ٸ. جانسٷگٸروۆ اتىنداعى جەتٸسۋ مەملەكەتتٸك ۋنيۆەرسيتەتٸنٸڭ ستۋدەنتتەرٸ ٷشٸن بەرٸلٸپ وتىرعان بۇل نىسان بٸلٸمگەرلەردٸڭ ٶمٸر سٷرۋ جاعدايىن جاقسارتىپ, بٸلٸم ساپاسىن ارتتىرۋعا ىقپال ەتەتٸن قادام بولماق.
«مەن وقۋعا تٷسكەندە ماعان جاڭا جاتاقحانادا تۇراسىڭ دەدٸ, بٸراق مەن العاشىندا سەنبەدٸم. شىنىندا دا قازٸر وسى ستۋدەنتتەر ٷيٸندە تەگٸن تۇرىپ جاتىرمىن. ٶتە قۋانىشتىمىن. بٸزدە كٸتاپحانا, كينوزالداردى ايتپاعاندا, تٸپتٸ كٸر جۋاتىن ماشيناعا دەيٸن بار. ەندٸ بٸز ەشتەڭەگە الاڭداماي تەك قانا جاقسى وقۋىمىز كەرەك», - «اينالايىن» بالالار ٷيٸنٸڭ تەربيەلەنۋشٸسٸ, ٸ. جانسٷگٸروۆ اتىنداعى جمۋ جۋرناليستيكا بٶلٸمٸنٸڭ 1 كۋرس ستۋدەنتٸ اياۋلىم قويشىباەۆا.
