تايلاندتىڭ پاتتاييا قالاسىندا رەسەيدەن كەلگەن ەپكە مەن ٸنٸسٸ جۇمباق جاعدايدا جوعالىپ كەتۋٸ قوعامدا ٷلكەن رەزونانس تۋدىردى, دەپ حابارلايدى ult.kz.
وقيعا 26 شٸلدە كٷنٸ تاڭعى ساعات تٶرت شاماسىندا بولعان. تٷمەن قالاسىنىڭ 22 جاستاعى تۇرعىنى ديانا نازيموۆا مەن ونىڭ 17 جاستاعى ٸنٸسٸ رومان بٸر موتوتسيكلمەن ٷيدەن شىعىپ كەتكەن. باقىلاۋ كامەرالارى ولاردىڭ اۋداننان كەتكەنٸن تٸركەگەن.
ارادا 24 مينۋت ٶتكەن سوڭ ديانانىڭ تەلەفونىنان «شۇعىل» دەگەن جالعىز سٶز جازىلعان حابارلاما كەلگەن. دەل سول ۋاقىتتا سمارتفون سوڭعى گەولوكاتسيياسىن جٸبەرگەن. ول ٷيدەن نەبەرٸ 200 مەتر قاشىقتىقتى كٶرسەتكەن. وسىدان كەيٸن اعالى-قارىنداس بايلانىسقا شىقپاعان.
جوعالىپ كەتەردٸڭ الدىندا ديانا اناسىنا iPhone تەلەفونى بەلگٸسٸز Bluetooth قۇرىلعىسىن انىقتاعانىن ايتىپ, ٶزٸن بٸرەۋدٸڭ اڭدىپ جٷرگەنٸن سەزەتٸنٸن جەتكٸزگەن.
قىزدىڭ اناسى بٸردەن پوليتسيياعا جٷگٸنگەن. كەيٸن رەسەيدٸڭ تايلاندتاعى ەلشٸلٸگٸ دە ٸسكە ارالاسىپ, جەرگٸلٸكتٸ قۇقىق قورعاۋ ورگاندارىمەن تۇراقتى بايلانىستا ەكەنٸن مەلٸمدەدٸ.
جەرگٸلٸكتٸ باق-تىڭ حابارلاۋىنشا, تەرگەۋ بارىسىندا كٷدٸكتٸ انىقتالىپ, ونىڭ ٷيٸنە ارنايى جاساقپەن وپەراتسييا جٷرگٸزٸلگەن. الايدا اعالى-قارىنداستىڭ تاعدىرى ەزٸرگە بەلگٸسٸز. تەرگەۋ جالعاسىپ جاتىر.
