ستامبۇلدا عيمارات شاتىرىنان قۇلاپ قازا تاپقان 26 جاستاعى قازاقستاندىق ايسۇلۋ بەكماحانوۆانىڭ ٶلٸمٸنە بايلانىستى ۇستالعان ەكٸ ادام سوت باقىلاۋىمەن بوساتىلدى. الايدا ولارعا تٷركييادان شىعۋعا تىيىم سالىندى, دەپ حابارلايدى ult.kz.
DHA اگەنتتٸگٸنٸڭ مەلٸمەتٸنشە, بۇعان دەيٸن پوليتسييا مارقۇممەن بٸرگە تۇرعان 22 جاستاعى رەسەي ازاماتى داريا ب. مەن ونىڭ سٷيٸكتٸسٸ بولۋى مٷمكٸن 35 جاستاعى مازحار ت.-نى ۇستاعان. جاۋاپ الىنعاننان كەيٸن ەكەۋٸ دە بوساتىلعان.
بەينەباقىلاۋ جازبالارىنان ايسۇلۋدىڭ قازا بولار الدىندا مازحار ت.-عا بارىپ, كەيٸن ٷيٸنە ورالعانى بايقالادى.
داريا ب.-نىڭ ايتۋىنشا, تاڭعى ساعات 08:15 شاماسىندا ول ايسۇلۋدى شاتىردىڭ شەتٸندە وتىرعان جەرٸنەن كٶرٸپ, تٶمەن تٷسۋٸن سۇراعان. الايدا كەيٸن بٶلمەسٸنە كەتكەن. بٸراز ۋاقىتتان سوڭ ويانىپ, ايسۇلۋدىڭ جوق ەكەنٸن بايقاعان. كەيٸن ونى عيماراتتىڭ تٶمەنگٸ جاعىنان قيمىلسىز جاتقان كٷيدە كٶرگەن.
الدىن الا بولجام بويىنشا, ايسۇلۋ التىنشى قاباتتاعى بالكوننان كٶرشٸ عيماراتتىڭ شاتىرىنا ٶتٸپ, شاتىردىڭ بٸر بٶلٸگٸ سىنعان كەزدە تٶمەنگە قۇلاعان بولۋى مٷمكٸن.
قازاقستاندىق قىز 25 قازاندا ستامبۇلدىڭ شيشلي اۋدانىندا قازا تاپتى. قازٸر تٷرٸك پوليتسيياسى وقيعانىڭ مەن-جايىن انىقتاپ جاتىر.
