سپورت جۋرناليسٸ اسلان قاجەنوۆ ازييا ويىندارى كەزٸندەگٸ بوكس سەسسيياسىنان كەيٸن گەنناديي گولوۆكينمەن بولعان كەلەڭسٸز جاعداي تۋرالى ەلەۋمەتتٸك جەلٸدە جازبا جارييالادى, دەپ حابارلايدى ult.kz.

جۋرناليست بۇعان دەيٸن گولوۆكين تۋرالى جاعىمسىز پٸكٸر بٸلدٸرمەگەنٸن, كەرٸسٸنشە ونى ەرەكشە قۇرمەتتەگەنٸن ايتتى. الايدا سوڭعى كەزدەسۋدەن كەيٸن وعان دەگەن كٶزقاراسى ٶزگەرگەنٸن جەتكٸزدٸ.

«بۇعان دەيٸن گەنناديي گولوۆكين تۋرالى بٸر نەگاتيۆ جازبادىم. كەرٸسٸنشە, قۇرمەتٸم ەرەكشە بولاتىن. بٷگٸن نٶلگە تٷستٸ. بوكس سەسسيياسىنان كەيٸن امانداسىپ جاتسام, “بەستىجىي” دەيدٸ», – دەپ جازدى قاجەنوۆ.

ونىڭ ايتۋىنشا, ول ٷنەمٸ قازاقستان سپورتشىلارىنىڭ جەتٸستٸكتەرٸ مەن مەسەلەلەرٸن كٶتەرٸپ كەلەدٸ. وسىعان بايلانىستى جۋرناليست گولوۆكيندٸ سپورتتاعى ناقتى مەسەلەلەرمەن اينالىسۋعا شاقىردى.

«ۆيكتورييانىڭ جەڭٸسٸن قايتار! ياسمينانىڭ التىنىن قايتار! باسقا دا جۇمىس جەتەدٸ. ٶز ەلٸڭنەن كەلگەن قاراكٶزدەرگە سٶزبەن اتىلىپ, ولاي مۇقاتا بەرمە! ناقتى ٸسپەن اينالىس!» – دەدٸ ول.

قاجەنوۆتٸڭ بۇل جازباسى ەلەۋمەتتٸك جەلٸدە قىزۋ تالقىلانىپ جاتىر.

گەنناديي گولوۆكين كٸم?

گەنناديي گولوۆكين – قازاقستاننان شىققان ەيگٸلٸ كەسٸپقوي بوكسشى. ول 1982 جىلى قاراعاندىدا دٷنيەگە كەلگەن. 2004 جىلى افينا وليمپياداسىندا كٷمٸس مەدال جەڭٸپ العان.

كەسٸپقوي بوكستا گولوۆكين ورتا سالماقتا ەكٸ دٷركٸن ەلەم چەمپيونى اتانىپ, مانسابىن 42 جەڭٸس, 2 جەڭٸلٸس جەنە 1 تەڭ نەتيجەمەن اياقتادى. ونىڭ 37 كەزدەسۋٸندە جەڭٸس نوكاۋتپەن كەلگەن. سونىمەن قاتار ول ورتا سالماقتاعى ەلەم چەمپيوندىق اتاعىن قاتارىنان 20 رەت قورعاعان.

2024 جىلدان بەرٸ گولوۆكين قازاقستان ۇلتتىق وليمپيادا كوميتەتٸنٸڭ پرەزيدەنتٸ قىزمەتٸن اتقارادى. ال 2025 جىلدىڭ قاراشاسىندا ول حالىقارالىق World Boxing ۇيىمىنىڭ پرەزيدەنتٸ بولىپ سايلاندى.

2026 جىلى گولوۆكين حالىقارالىق بوكس داڭقى زالىنا ەنگٸزٸلدٸ. ول بۇل مەرتەبەگە يە بولعان قازاقستاننان شىققان العاشقى سپورتشى بولدى.