فوتو: قر سٸم
سىرتقى ٸستەر مينيسترلٸگٸنٸڭ رەسمي ٶكٸلٸ ايبەك سماديياروۆ قازاقستان مەن قىتاي ٷكٸمەتتەرٸ اراسىنداعى اقپارات الماسۋ كەلٸسٸمٸنە تٷسٸنٸك بەردٸ, دەپ حابارلايدى قازاقپارات اگەنتتٸگٸ.
«قىتايداعى قازاقتاردىڭ مەسەلەسٸمەن اينالىساتىن قۇقىق قورعاۋ ۇيىمدارى الماتىدا بٸرنەشە رەت جيىن ٶتكٸزٸپ, الاڭداۋشىلىق بٸلدٸرٸپ جاتىر. قازاقستان مەن قىتاي ٷكٸمەتتەرٸ رەسٸمدەگەن قۇجات ارقىلى (قازاقستان ٷكٸمەتٸ مەن قىتاي ٷكٸمەتٸ اراسىنداعى تاراپتار مەملەكەتتەرٸنٸڭ ازاماتتارىنا قاتىستى اقپارات الماسۋ تۋرالى كەلٸسٸمدٸ راتيفيكاتسييالاۋ تۋرالى زاڭ) ەرتەڭ قازاقستان ازاماتتىعىن سۇراعان ۇلتى قازاقتاردىڭ پاسپورتىنا ۆەتو جارييالاۋى مٷمكٸن دەگەن قاۋٸپ بار. وسىعان نەگٸز بار ما?» دەپ سۇرادى باق ٶكٸلدەرٸ اتالعان ۆەدومستۆودا ٶتكەن بريفينگتە.
سٸم رەسمي ٶكٸلٸنٸڭ ايتۋىنشا, اتالعان كەلٸسٸمنٸڭ باستى ورىنداۋشىسى — ٸشكٸ ٸستەر مينيسترلٸگٸ.
«سوندىقتان مەن تولىق تٷسٸنٸكتەمە بٸلدٸرە المايمىن. ٶيتكەنٸ بۇل قۇجاتتىڭ مەن-جايىق انىق بٸلمەيمٸن. ٶزدەرٸڭٸز بٸلەسٸزدەر, كارانتيننەن كەيٸن مىڭداعان قانداسىمىز ەلگە كەلدٸ. ول — قىتاي تاراپىمەن تىعىز جۇمىس ٸستەگەنٸمٸزدٸڭ نەتيجەسٸ. سوندىقتان ودان قورقۋدىڭ قاجەتٸ جوق. تەك قانا زاڭسىز قۇجاتپەن جٷرگەن, قوس ازاماتتىعى بار ادامداردى انىقتاۋ ٷشٸن جاسالىپ جاتىر», — دەدٸ رەسمي ٶكٸل.
ول قىتايدىڭ ازاماتتىعىنان شىقپاي سول ەلدەن زەينەتاقى الىپ جٷرگەن, بٸراق قازاقستاندا تۇراتىن ازاماتتارعا شەكتەۋ قويىلاتىنىن ايتادى.
«بەرٸ دەپ ايتا المايمىن. بٸراق اراسىندا بار. قىتاي ازاماتتىعىنان شىقپاي سول جاقتان زەينەتاقىسىن الىپ جٷرەدٸ. بۇل جاققا كەلٸپ قۇجاتتارىن رەسٸمدەيدٸ. سولاي ەكٸ ەلدٸڭ اراسىندا جٷرەتٸندەر بار. ەكٸ ەلدەن بٸردەي تٶلەم الۋ زاڭسىز. زاڭدى بۇزعاننان كەيٸن مٸندەتتٸ تٷردە شارا قولدانىلادى», — دەدٸ ايبەك سماديياروۆ.
ايتا كەتەيٸك, تاياۋدا مەجٸلٸستٸڭ جالپى وتىرىسىندا قازاقستان ٷكٸمەتٸ مەن قىتاي ٷكٸمەتٸ اراسىنداعى تاراپتار قوس ەلدٸڭ ازاماتتارىنا قاتىستى اقپارات الماسۋ تۋرالى كەلٸسٸمدٸ راتيفيكاتسييالاۋ تۋرالى زاڭ قابىلدانعان ەدٸ.
