بٷگٸن مەجٸلٸستٸڭ جالپى وتىرىسىندا سىبايلاس جەمقورلىققا قارسى ٸس-قيمىل مەسەلەلەرٸنە قاتىستى زاڭ جوباسىن بٸرٸنشٸ وقىلىمدا تالقىلاۋ كەزٸندە قۇجاتتىڭ نەگٸزگٸ باعىتتارى تٷسٸندٸرٸلدٸ, دەپ حابارلايدى قازاقپارات.
«بٸرٸنشٸسٸ – زاڭسىز بايۋعا جاۋاپتىلىق قاراستىرۋ. ۇسىنىلىپ وتىرعان نورما – جەمقورلىققا قارسى ٸس-قيمىل جٷيەسٸنٸڭ نەگٸزگٸ ٸرگەتاسى دەپ اتاۋعا بولادى. ٶيتكەنٸ, جاسىراتىنى جوق, جەمقورلىقتىڭ ارقاسىندا دٷنيە جيناپ, ولاردى باسقالارعا تٸركەپ, اكتيۆتەردٸ جاسىرۋ سحەماسى بەرٸنە مەلٸم. ال, وسى جاسىرىن بايلىققا زاڭسىز جولمەن يە بولعانىن دەلەلدەۋ وڭاي ەمەس. سوندىقتان, ازاماتتاردىڭ شىعىندارى زاڭدى تابىسىنان نەگٸزسٸز اسىپ كەتسە, تيٸستٸ شارالار قابىلداۋ قاجەت», - دەدٸ قر سىبايلاس جەمقورلىققا قارسى ٸس-قيمىل اگەنتتٸگٸنٸڭ تٶراعاسى مارات احمەتجانوۆ.
ونىڭ ايتۋىنشا, وسىعان بايلانىستى, قولدانىستاعى زاڭمانامادا كٶزدەلگەن 10 پايىزدىق جەكە تابىس سالىعىنان باسقا, مەملەكەتتٸك قىزمەتشٸلەردٸڭ جاۋاپكەرشٸلٸگٸن كٷشەيتۋ ۇسىنىلدى.
«اتاپ ايتقاندا, شەنەۋنٸكتەردٸڭ شىعىستارى مەن تابىستارىنىڭ ايىرماشىلىعى 1000 ايلىق كٶرسەتكٸشتەن اسىپ تٷسسە فيسكالدىق سانكتسييا قارالادى. ياعني ايىرماشىلىق سوماسىنىڭ 90 پايىزى ەكٸمشٸلٸك ايىپپۇل رەتٸندە تەركٸلەدٸ. دەگەنمەن ەربٸر جاعدايدا شىعىنداردىڭ زاڭدىلىعىن تٷسٸندٸرۋگە بەرٸنە مٷمكٸندٸك بەرٸلەدٸ. ال ەگەر سول ايىرماشىلىق جىلدىق تابىستان اسىپ جاتسا جەنە ونىڭ قايدان شىققانىن تٷسٸندٸرە الماسا, مانساپتىق جازا قارالادى. ول دەگەنٸمٸز - مەملەكەتتٸك قىزمەتتەن ٷش جىلعا تەرٸس سەبەپتەرمەن بوساتىلادى», - دەدٸ اگەنتتٸك باسشىسى.
«جالپى, نەگٸزسٸز بايۋعا جاۋاپكەرشٸلٸك ەنگٸزۋ – دەكلاراتسييانىڭ قيسىندى جالعاسى. ٶزدەرٸڭٸز بٸلەسٸز, دەكلاراتسييا تاپسىرۋ مەرزٸمٸ كەزەڭدەرگە بٶلٸنگەن. بٸرٸنشٸ كەزەڭدە – مەملەكەتتٸك قىزمەتشٸلەر. ولار بىلتىر كٸرٸستەرٸن كٶرسەتتٸ. ەندٸ تابىستارى مەن شىعىستارىن سالىستىرۋ باستالادى. ەكٸنشٸ كەزەڭدە – 2023-2024 جىلدار: مەملەكەتتٸك مەكەمەلەر مەن كۆازيسەكتوردىڭ قىزمەتكەرلەرٸ. ٷشٸنشٸ كەزەڭدە – 2024-2025 جىلدار: زاڭدى تۇلعالاردىڭ باسشىلارى مەن قۇرىلتايشىلارى. سوڭعى كەزەڭ – 2025-2026 جىلدارى دەكلاراتسييانى قالعان ازاماتتتاردىڭ بارلىعى تاپسىرادى. سودان كەيٸن عانا بارشا حالىقتىڭ اكتيۆتەرٸ مەن مٷلكٸ تۋرالى بەلگٸلٸ بولادى. جاۋاپتىلىق تۋرالى نورما قولدانىسقا ەنەدٸ», - دەدٸ احمەتجانوۆ.
وسى ورايدا ول ۇسىنىلعان شارا حالىقارالىق ستاندارت ەكەنٸن, بۇۇ كوررۋپتسيياعا قارسى كونۆەنتسيياسىنىڭ نەگٸزگٸ تالابى بولىپ سانالاتىنىن جەتكٸزدٸ.
