Búgin Májilistiń jalpy otyrysynda sybailas jemqorlyqqa qarsy is-qimyl máselelerine qatysty zań jobasyn birinshi oqylymda talqylaý kezinde qujattyń negizgi baǵyttary túsindirildi, dep habarlaidy QazAqparat.
«Birinshisi – zańsyz baiýǵa jaýaptylyq qarastyrý. Usynylyp otyrǵan norma – jemqorlyqqa qarsy is-qimyl júiesiniń negizgi irgetasy dep ataýǵa bolady. Óitkeni, jasyratyny joq, jemqorlyqtyń arqasynda dúnie jinap, olardy basqalarǵa tirkep, aktivterdi jasyrý shemasy bárine málim. Al, osy jasyryn bailyqqa zańsyz jolmen ie bolǵanyn dáleldeý ońai emes. Sondyqtan, azamattardyń shyǵyndary zańdy tabysynan negizsiz asyp ketse, tiisti sharalar qabyldaý qajet», - dedi QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov.
Onyń aitýynsha, osyǵan bailanysty, qoldanystaǵy zańmanamada kózdelgen 10 paiyzdyq jeke tabys salyǵynan basqa, memlekettik qyzmetshilerdiń jaýapkershiligin kúsheitý usynyldy.
«Atap aitqanda, sheneýnikterdiń shyǵystary men tabystarynyń aiyrmashylyǵy 1000 ailyq kórsetkishten asyp tússe fiskaldyq sanktsiia qaralady. Iaǵni aiyrmashylyq somasynyń 90 paiyzy ákimshilik aiyppul retinde tárkiledi. Degenmen árbir jaǵdaida shyǵyndardyń zańdylyǵyn túsindirýge bárine múmkindik beriledi. Al eger sol aiyrmashylyq jyldyq tabystan asyp jatsa jáne onyń qaidan shyqqanyn túsindire almasa, mansaptyq jaza qaralady. Ol degenimiz - memlekettik qyzmetten úsh jylǵa teris sebeptermen bosatylady», - dedi agenttik basshysy.
«Jalpy, negizsiz baiýǵa jaýapkershilik engizý – deklaratsiianyń qisyndy jalǵasy. Ózderińiz bilesiz, deklaratsiia tapsyrý merzimi kezeńderge bólingen. Birinshi kezeńde – memlekettik qyzmetshiler. Olar byltyr kiristerin kórsetti. Endi tabystary men shyǵystaryn salystyrý bastalady. Ekinshi kezeńde – 2023-2024 jyldar: memlekettik mekemeler men kvazisektordyń qyzmetkerleri. Úshinshi kezeńde – 2024-2025 jyldar: zańdy tulǵalardyń basshylary men quryltaishylary. Sońǵy kezeń – 2025-2026 jyldary deklaratsiiany qalǵan azamatttardyń barlyǵy tapsyrady. Sodan keiin ǵana barsha halyqtyń aktivteri men múlki týraly belgili bolady. Jaýaptylyq týraly norma qoldanysqa enedi», - dedi Ahmetjanov.
Osy oraida ol usynylǵan shara halyqaralyq standart ekenin, BUU Korrýptsiiaǵa qarsy konventsiiasynyń negizgi talaby bolyp sanalatynyn jetkizdi.
