فوتو: Reuters
شۆەتسييانىڭ ناتو-عا قوسىلۋى ٷشٸن تٷركييا قويىپ وتىرعان شارتتاردى تٷگەل ورىنداۋ مٷمكٸن ەمەس. بۇل جٶنٸندە شۆەتسييا پرەمەر-مينيسترٸ ۋلف كريستەرسسون مەلٸمدەدٸ. ول تٷركييا شۆەتسييانىڭ ناتو-عا قوسىلۋىنا تٷبٸندە كەلٸسٸم بەرەتٸنٸنە سەنٸمدٸ ەكەنٸن ايتتى.
كريستەرسسوننىڭ "تٷركييا ٶزٸ قويعان شارتتاردىڭ بەرٸن شۆەتسييا قازٸردٸڭ ٶزٸندە ورىندادى دەپ وتىر. بٸراق تاعى دا شارت قويعىسى كەلەدٸ. بٸز ول شارتتارىن ورىنداي المايمىز, ورىنداعىمىز دا كەلمەيدٸ" دەگەن سٶزٸن Reuters اگەنتتٸگٸ تاراتتى. بٸراق ول ناقتى قانداي شارتتار قويعانىن اتاماعان.
كٶپتەگەن جىلدان بەرٸ بەيتاراپ ساياسات ۇستانىپ كەلە جاتقان شۆەتسييا مەن فينلياندييا 2022 جىلى اقپاندا رەسەي ۋكرايناعا باسىپ كٸرگەن سوڭ, مامىر ايىندا ناتو-عا قوسىلعىسى كەلەتٸنٸ جٶنٸندە ٶتٸنٸش جازعان. ناتو-عا مٷشە بولۋ ٷشٸن ناتو-نىڭ 30 مٷشەسٸ تٷگەل كەلٸسٸم بەرۋگە تيٸس. قازٸر 28 مەملەكەت كەلٸسٸپ وتىر. ۆەنگرييا دا تاياۋدا حاتتامانى بەكٸتەدٸ.
الايدا ناتو-نىڭ تاعى بٸر مٷشەسٸ تٷركييا فينلياندييا مەن شۆەتسيياعا شارت قويعان. ونىڭ بٸرٸ — كٷرد ۇيىمدارىن تەررور ۇيىم دەپ جارييالاۋ, ولاردىڭ جەتەكشٸلەرٸن تٷركيياعا بەرۋ.
ماۋسىمنىڭ سوڭىندا ناتو-نىڭ مادريدتە ٶتكەن سامميتٸندە ٷش ەل بٸرلەسكەن مەموراندۋمعا قول قويعان. مەموراندۋم بويىنشا شۆەتسييا مەن فينلياندييا ٶزدەرٸنە مٸندەتتەمە العان, تٷركييا ولاردىڭ ناتو-عا قوسىلۋىنا كەدەرگٸ جاساماۋعا ۋەدە بەرگەن.
ٶتكەن جىلدىڭ سوڭىندا شۆەتسييا جوعارعى سوتى انكارا سۇراتقان تٷرٸك جۋرناليسٸن ەكستراديتسييالاۋعا رۇقسات بەرمەگەن. تٷركييا بۇل جۋرناليستٸ تٶڭكەرٸس جاساۋدى ۇيىمداستىرۋعا قاتىسقان دەپ ەسەپتەيدٸ.
