Foto: Reuters
Shvetsiianyń NATO-ǵa qosylýy úshin Túrkiia qoiyp otyrǵan sharttardy túgel oryndaý múmkin emes. Bul jóninde Shvetsiia premer-ministri Ýlf Kristersson málimdedi. Ol Túrkiia Shvetsiianyń NATO-ǵa qosylýyna túbinde kelisim beretinine senimdi ekenin aitty.
Kristerssonnyń "Túrkiia ózi qoiǵan sharttardyń bárin Shvetsiia qazirdiń ózinde oryndady dep otyr. Biraq taǵy da shart qoiǵysy keledi. Biz ol sharttaryn oryndai almaimyz, oryndaǵymyz da kelmeidi" degen sózin Reuters agenttigi taratty. Biraq ol naqty qandai sharttar qoiǵanyn atamaǵan.
Kóptegen jyldan beri beitarap saiasat ustanyp kele jatqan Shvetsiia men Finliandiia 2022 jyly aqpanda Resei Ýkrainaǵa basyp kirgen soń, mamyr aiynda NATO-ǵa qosylǵysy keletini jóninde ótinish jazǵan. NATO-ǵa múshe bolý úshin NATO-nyń 30 múshesi túgel kelisim berýge tiis. Qazir 28 memleket kelisip otyr. Vengriia da taiaýda hattamany bekitedi.
Alaida NATO-nyń taǵy bir múshesi Túrkiia Finliandiia men Shvetsiiaǵa shart qoiǵan. Onyń biri — kúrd uiymdaryn terror uiym dep jariialaý, olardyń jetekshilerin Túrkiiaǵa berý.
Maýsymnyń sońynda NATO-nyń Madridte ótken sammitinde úsh el birlesken memorandýmǵa qol qoiǵan. Memorandým boiynsha Shvetsiia men Finliandiia ózderine mindetteme alǵan, Túrkiia olardyń NATO-ǵa qosylýyna kedergi jasamaýǵa ýáde bergen.
Ótken jyldyń sońynda Shvetsiia Joǵarǵy soty Ankara suratqan túrik jýrnalisin ekstraditsiialaýǵa ruqsat bermegen. Túrkiia bul jýrnalisti tóńkeris jasaýdy uiymdastyrýǵa qatysqan dep esepteidi.
