پرەزيدەنت قاسىم-جومارت توقاەۆ شەمشٸ قالداياقوۆقا جوعارى دەرەجەلٸ ەرەكشەلٸك بەلگٸسٸ – "قازاقستاننىڭ ەڭبەك ەرٸ" اتاعىن بەرۋ تۋرالى جارلىققا قول قايدى, دەپ حابارلايدى اقوردانىڭ باسپاسٶز قىزمەتٸ.
"قازاق حالقىنىڭ مۋزىكا ٶنەرٸن دامىتۋداعى ايرىقشا ەڭبەگٸ ٷشٸن كومپوزيتور شەمشٸ قالداياقوۆقا (مارقۇم) جوعارى دەرەجەلٸ ەرەكشەلٸك بەلگٸسٸ – "قازاقستاننىڭ ەڭبەك ەرٸ" اتاعى بەرٸلٸپ, ايرىقشا ەرەكشەلٸك بەلگٸسٸ – التىن جۇلدىز بەن "وتان" وردەنٸ تاپسىرىلسىن", - دەلٸنگەن جارلىقتا.
شەمشٸ قالداياقوۆ 1930 جىلى 15 تامىزدا قازٸرگٸ تٷركٸستان وبلىسى وتىرار اۋدانى شەۋٸلدٸر اۋىلىندا دٷنيەگە كەلگەن. حالقىن سٷيگەن, حالقى سٷيگەن سازگەر 1992 جىلدىڭ 29 اقپانىندا كٶز جۇمدى.
شەمشٸ قالداياقوۆ ارتىنان 300-گە جۋىق ەن جازىپ قالدىردى. سىرعا تولى, مۇڭعا تولى نەزٸك, ىرعاقتى ەندەرٸ قازاق دالاسىن الاقانىنا سالىپ ايالاپ, ەلٸ دە تەربەتٸپ كەلەدٸ.
