استانادا چەحيياعا جۇمىسقا ورنالاستىرۋعا ۋەدە بەرٸپ, ازاماتتاردى الداعان دەگەن كٷدٸكپەن 31 جاستاعى ەر ادام ۇستالدى, دەپ حابارلايدى ult.kz.
قر ٸٸم باسپاسٶز قىزمەتٸ مەلٸمەتٸنشە, كٷدٸكتٸ شەتەلدە جوعارى جالاقىلى جۇمىسقا ورنالاستىرۋعا كٶمەكتەسەتٸنٸن ايتىپ, ازاماتتاردىڭ سەنٸمٸنە كٸرگەن. ول كەمٸندە التى ادامنان تٷرلٸ كٶلەمدە اقشا الىپ, كەيٸن ۋەدە ەتكەن قىزمەتٸن كٶرسەتپەي, بايلانىسقا شىقپاي قويعان.
پوليتسييانىڭ مەلٸمەتٸنشە, كٷدٸكتٸ ٶز كٸنەسٸن تولىق مويىنداعان. الدىن الا ەسەپ بويىنشا كەلتٸرٸلگەن ماتەريالدىق شىعىننىڭ جالپى كٶلەمٸ شامامەن 800 مىڭ تەڭگەنٸ قۇرايدى.
اتالعان فاكتٸ بويىنشا سوتقا دەيٸنگٸ تەرگەۋ امالدارى جٷرگٸزٸلٸپ جاتىر.
وسىعان بايلانىستى پوليتسييا ازاماتتاردى شەتەلگە جۇمىسقا ورنالاستىرۋ جٶنٸندەگٸ كٷمەندٸ ۇسىنىستارعا سەنبەۋگە شاقىردى. قۇقىق قورعاۋ ورگاندارى مۇنداي قىزمەت ۇسىناتىن ۇيىمداردىڭ ليتسەنزيياسى مەن زاڭدى قىزمەتٸن الدىن الا تەكسەرۋگە, كەلٸسٸمشارت تالاپتارىمەن مۇقييات تانىسۋعا جەنە ونىڭ زاڭدىلىعىنا تولىق كٶز جەتكٸزبەي تۇرىپ اقشا اۋدارماۋعا كەڭەس بەرەدٸ.
ەگەر الاياقتىق بەلگٸلەرٸ بايقالسا نەمەسە كٷمەندٸ جاعدايعا تاپ بولساڭىز, دەرەۋ 102 نٶمٸرٸنە حابارلاسۋ قاجەت.
ايتا كەتەيٸك, بۇعان دەيٸن كٶكشەتاۋدا دا شەتەلگە جۇمىسقا ورنالاستىرۋ قىزمەتٸنە قاتىستى الاياقتىق فاكتٸسٸ بويىنشا قىلمىستىق ٸس تەرگەلٸپ جاتقانى حابارلانعان بولاتىن.
