ٶزبەكستان پرەزيدەنتٸ يسلام اكانىڭ ينسۋلتٸ ميلليونداردىڭ باس اۋرۋىنا اينالىپ كەتۋٸ مٷمكٸن بە? ەبدەن مٷمكٸن. ەبدەن مٷمكٸن ەگەر يسلام اكا ناۋقاسىنان ايىقپاسا, نە ونىڭ ورنىنا سونداي ەمٸر-تەمٸر مۇراگەر كەلمەسە. ٶيتكەنٸ, ٶزبەكستان بٸراز جىلدىڭ ٸشٸندە ايماقتىق دەرجاۆاعا اينالىپ ٷلگەردٸ.
ٶز تەرريتوريياسىنداعى ۇلىستار مەن رۋلاردى, ٶزگە ۇلت ٶكٸلدەرٸن ٶزبەك ۇلتىنا اينالدىردى. ەشكٸمدٸ تىرپ ەتكٸزبەيتٸن, بۇلعاقتاعانداردىڭ باسىن قاعىپ تاستايتىن تەمٸردەي تەرتٸپ جٷيەسٸن قۇرىپ الدى. سىرتقى قارىزى جوق. ەكونوميكاسى ٸشكٸ ٶندٸرٸسكە نەگٸزدەلگەن. تاستٷيٸن ارميياسى بار. مٸنە, سوندىقتان دا ٶزبەكستان بٷگٸن اۋعانىستان تەلٸپتەرٸنە قارسى تۇرا الاتىن ايماقتاعى جالعىز كٷش, كٸمگە بولسا دا تٶتەپ بەرە الاتىن تاستٷيٸن جۇدىرىق.
تەلٸپتەردٸڭ ورتالىق ازيياعا دەندەپ ەنٸپ كەتۋٸنە كەدەرگٸ بولىپ وتىرعان - ٶزبەكتٸڭ قۋاتى. اراققا تويىپ الىپ تٶبەلەس ٸزدەيتٸن اۋىلدىڭ ەۋمەسەرٸ سيياقتى رەسەيدٸڭ ٶزٸ ٶزبەكستاندى مٷيٸزدەردە مىڭ رەت ويلانادى. دٷنيەنٸ جالماپ كەلە جاتقان ازييانىڭ اجداھاسى دا ٶزبەكتٸڭ تاماعىنان ٶتپەي قالاتىنىن جاقسى سەزٸنەدٸ. ٶيتكەنٸ, ٶزبەك اعايىن ۇلت پەن مەملەكەتتٸڭ بٸرلٸگٸنە قاجەت زاڭدىلىقتار مەن دەستٷر-سالتتاردى, فيلوسوفييا مەن دٸنٸن نەگٸزدەپ ٷلگەردٸ. ٶزبەكستان بٷلٸنبەسٸن. بۇل جەردە يسلامنىڭ تەرەڭ تامىرى بار. ٶزبەكتەر شىن مەنٸندە يسلام دٸنٸنە بەرٸك. سول سەبەپتٸ دە ٶزبەك بيلٸگٸ دٸن ساياساتىن ۋىسىنان شىعارماي كەلدٸ. ۋاحابيزمدٸ جولاتقان جوق.
ال, كٸشٸ ازييانى استان-كەستەن ەتٸپ جاتقان دٸني اعىمدار ٶزبەكستانعا ٶتٸپ كەتسە, نە بولاتىنىن كٶزگە ەلەستەتۋدٸڭ ٶزٸ قيىن. وندا سيرييا مەن يراكتىڭ اينالاسىنداعى دٷربەلەڭ جولدا قالاتىن شىعار? جەر شارىن جەكە مەنشٸگٸندەي كٶرٸپ, قالاعانىن جاتقىزىپ-تۇرعىزاتىن كٷشتٸلەرگە ٶزبەكستاننىڭ ەلسٸرەگەنٸ كەرەك. سوندا ولار بۇل جەردە دە ساياسي ويىندارىن ەركٸن جٷرگٸزەتٸن بولادى.
وتىز ميلليوننىڭ قولىنا وت بەرٸپ, الاساپىرانعا سالىپ قويۋ دەگەن نە ولارعا? وندا ورتالىق ازييا وتقا وراندى دەي بەرٸڭٸز. وندا ورتالىق ازييا تالان-تاراجعا, ۇلت تاعدىرى - تالاپايعا تٷسەدٸ. بەتٸن اۋلاق قىلسىن ول پەلەنٸڭ! ٶزبەكستان بٷلٸنبەسٸن.
سەرٸك جانبولاتتىڭ فەيسبۋكتاعى جازباسىنان
