Ózbekstan Prezidenti Islam akanyń insýlti milliondardyń bas aýrýyna ainalyp ketýi múmkin be? Ábden múmkin. Ábden múmkin eger Islam aka naýqasynan aiyqpasa, ne onyń ornyna sondai ámir-temir murager kelmese. Óitkeni, Ózbekstan biraz jyldyń ishinde aimaqtyq derjavaǵa ainalyp úlgerdi.
Óz territoriiasyndaǵy ulystar men rýlardy, ózge ult ókilderin ózbek ultyna ainaldyrdy. Eshkimdi tyrp etkizbeitin, bulǵaqtaǵandardyń basyn qaǵyp tastaityn temirdei tártip júiesin quryp aldy. Syrtqy qaryzy joq. Ekonomikasy ishki óndiriske negizdelgen. Tastúiin armiiasy bar. Mine, sondyqtan da Ózbekstan búgin Aýǵanystan tálipterine qarsy tura alatyn aimaqtaǵy jalǵyz kúsh, kimge bolsa da tótep bere alatyn tastúiin judyryq.
Tálipterdiń Ortalyq Aziiaǵa dendep enip ketýine kedergi bolyp otyrǵan - ózbektiń qýaty. Araqqa toiyp alyp tóbeles izdeitin aýyldyń áýmeseri siiaqty Reseidiń ózi Ózbekstandy múiizderde myń ret oilanady. Dúnieni jalmap kele jatqan Aziianyń ajdahasy da ózbektiń tamaǵynan ótpei qalatynyn jaqsy sezinedi. Óitkeni, ózbek aǵaiyn ult pen memlekettiń birligine qajet zańdylyqtar men dástúr-salttardy, filosofiia men dinin negizdep úlgerdi. Ózbekstan búlinbesin. Bul jerde islamnyń tereń tamyry bar. Ózbekter shyn máninde islam dinine berik. Sol sebepti de ózbek biligi din saiasatyn ýysynan shyǵarmai keldi. Ýahabizmdi jolatqan joq.
Al, kishi Aziiany astan-kesten etip jatqan dini aǵymdar Ózbekstanǵa ótip ketse, ne bolatynyn kózge elestetýdiń ózi qiyn. Onda Siriia men Iraktyń ainalasyndaǵy dúrbeleń jolda qalatyn shyǵar? Jer sharyn jeke menshigindei kórip, qalaǵanyn jatqyzyp-turǵyzatyn kúshtilerge Ózbekstannyń álsiregeni kerek. Sonda olar bul jerde de saiasi oiyndaryn erkin júrgizetin bolady.
Otyz millionnyń qolyna ot berip, alasapyranǵa salyp qoiý degen ne olarǵa? Onda Ortalyq Aziia otqa orandy dei berińiz. Onda Ortalyq Aziia talan-tarajǵa, ult taǵdyry - talapaiǵa túsedi. Betin aýlaq qylsyn ol páleniń! Ózbekstan búlinbesin.
Serik Janbolattyń feisbýktaǵy jazbasynan
