فوتو: sadaq.kz
جۋىردا سارىٶزەك گارنيزونىندا داستان قۇرمانبەك ەسٸمدٸ سارباز كٶز جۇمدى. بۇدان بٶلەك, سارىٶزەك ەسكەري گارنيزونى مايورى سامات اسانوۆتىڭ ەسٸرتكٸ جەنە پسيحوتروپتى زاتتاردى زاڭسىز اينالىمعا شىعارۋ ٸسٸ – بويىنشا قىلمىستىق ٸس قوزعالعانى باق بەتتەرٸنە شىققان. بۇل باق ٶكٸلدەرٸنە بەلگٸلٸ ٷلكەن وقيعالار. ال بۇقارانىڭ نازارىنان تىس تاعى نە بولىپ جاتقانى بەيمەلٸم. سارىٶزەك گارنيزونى قاتاڭ باقىلاۋعا الىنۋى, مايشاممەن تەكسەرٸلۋٸ كەرەك ەمەس پە? Ult.kz تٸلشٸسٸ بۇل سۇراقتى قر قارۋلى كٷشتەرٸ قۇرلىق ەسكەرلەرٸ باس قولباسشىسىنىڭ بٸرٸنشٸ ورىنباسارى – باس شتاب باستىعى گەنەرال-مايور قۋانىشبەك ٷشتاەۆقا قويدى.
"قازٸرگٸ تاڭدا سارىٶزەك گارنيزونى قۇرلىق ەسكەرلەرٸ باسشىلىعىن ٶتە كٶپ الاڭداتىپ جاتىر. ونىڭ نەگٸزگٸ سەبەبٸ سوڭعى كەزدە بولىپ جاتقان قاتارداعى جاۋىنگەرٸمٸزدٸڭ بٸر شىعىنا, ەكٸنشٸ شىعىنىنىڭ بولۋى. سوسىن ەسٸرتكٸ تاسۋعا بايلانىستى جاعداي دا ورىن الدى. ونىڭ بارلىعىن قازٸر سٸزگە ەفيردە جايىپ ايتا المايمىز, بٸراق بٸزدٸڭ قورعانىس مينيسترلٸگٸمەن, باسشىلىقپەن جەنە دە وسى قۇرلىق ەسكەرلەرٸ باسشىلىعىنان ٷلكەن-ٷلكەن ٶزگەرٸستەر ەنگٸزٸلدٸ", -دەدٸ قۋانىشبەك ٷشتاەۆ.
الايدا گەنەرال-مايور الداعى بٸر جىلدىڭ ٸشٸندە سارىٶزەك گارنيزونىندا جاعداي جاقسارادى دەپ وتىر.
"بٸز بۇل جاعدايدى 10 كٷندە, 20 كٷندە, بٸر ايدا جٶندەيمٸز دەپ ايتا المايمىز. بٸراق جارتى جىل, بٸر جىلدا وسى ٶڭٸردەگٸ جاعداي دۇرىسالۋى كەرەك. ول جەردە تاعى دا كٶمەككە تيەسٸلٸ باسقارما ورگانى تاعايىندالىپ, قازٸر ٶز جۇمىستارىنا كٸرٸستٸ", -دەيدٸ قۋانىشبەك ٷشتاەۆ.
ەسكە سالا كەتەيٸك, 14 قاڭتاردا جەتٸسۋ وبلىسى سارىٶزەك ەسكەري گارنيزونىندا 18 جاستاعى سارباز داستان قۇرمانبەك قازا بولدى.
"ەسكەري-دالالىق وقۋ-جاتتىعۋلار كەزٸندە ەسكەرگە شاقىرىلعان سارباز اتىس قارۋىن قولدانۋ ەرەجەسٸن بۇزىپ, تٶس سٷيەگٸنەن جاراقات الدى. قىلمىستىق ٸس قوزعالدى. سەبەپتەرٸ انىقتالىپ, تەرگەۋ شارالارى جٷرگٸزٸلٸپ جاتىر. قازاقستان رەسپۋبليكاسى قۇرلىق ەسكەرٸنٸڭ باس قولباسشىسى باسقاراتىن ارنايى كوميسسييا قۇرىلدى", دەپ جازىلعان حابارلامادا.
قازا بولعان سارباز جەتٸسايلىق 18 جاستاعى داستان قۇرمانبەكتٸڭ اتا-اناسى ۇلى “كالاشنيكوۆ اۆتوماتىنان ٶزٸنە وق اتتى” دەگەنگە سەنبەيدٸ. ولار ۇلدارىنىڭ ٶلٸمٸن ەدٸل تەرگەۋدٸ تالاپ ەتٸپ وتىر.
