Foto: sadaq.kz
Jýyrda Saryózek garnizonynda Dastan Qurmanbek esimdi sarbaz kóz jumdy. Budan bólek, Saryózek áskeri garnizony maiory Samat Asanovtyń esirtki jáne psihotropty zattardy zańsyz ainalymǵa shyǵarý isi – boiynsha qylmystyq is qozǵalǵany BAQ betterine shyqqan. Bul BAQ ókilderine belgili úlken oqiǵalar. Al buqaranyń nazarynan tys taǵy ne bolyp jatqany beimálim. Saryózek garnizony qatań baqylaýǵa alynýy, maishammen tekserilýi kerek emes pe? Ult.kz tilshisi bul suraqty QR Qarýly kúshteri Qurlyq áskerleri bas qolbasshysynyń birinshi orynbasary – Bas shtab bastyǵy general-maior Qýanyshbek Úshtaevqa qoidy.
"Qazirgi tańda Saryózek garnizony Qurlyq áskerleri basshylyǵyn óte kóp alańdatyp jatyr. Onyń negizgi sebebi sońǵy kezde bolyp jatqan qatardaǵy jaýyngerimizdiń bir shyǵyna, ekinshi shyǵynynyń bolýy. Sosyn esirtki tasýǵa bailanysty jaǵdai da oryn aldy. Onyń barlyǵyn qazir sizge efirde jaiyp aita almaimyz, biraq bizdiń Qorǵanys ministrligimen, basshylyqpen jáne de osy Qurlyq áskerleri basshylyǵynan úlken-úlken ózgerister engizildi", -dedi Qýanyshbek Úshtaev.
Alaida general-maior aldaǵy bir jyldyń ishinde Saryózek garnizonynda jaǵdai jaqsarady dep otyr.
"Biz bul jaǵdaidy 10 kúnde, 20 kúnde, bir aida jóndeimiz dep aita almaimyz. Biraq jarty jyl, bir jylda osy óńirdegi jaǵdai durysalýy kerek. Ol jerde taǵy da kómekke tiesili basqarma organy taǵaiyndalyp, qazir óz jumystaryna kiristi", -deidi Qýanyshbek Úshtaev.
Eske sala keteiik, 14 qańtarda Jetisý oblysy Saryózek áskeri garnizonynda 18 jastaǵy sarbaz Dastan Qurmanbek qaza boldy.
"Áskeri-dalalyq oqý-jattyǵýlar kezinde áskerge shaqyrylǵan sarbaz atys qarýyn qoldaný erejesin buzyp, tós súieginen jaraqat aldy. Qylmystyq is qozǵaldy. Sebepteri anyqtalyp, tergeý sharalary júrgizilip jatyr. Qazaqstan Respýblikasy qurlyq áskeriniń bas qolbasshysy basqaratyn arnaiy komissiia quryldy", dep jazylǵan habarlamada.
Qaza bolǵan sarbaz jetisailyq 18 jastaǵy Dastan Qurmanbektiń ata-anasy uly “Kalashnikov avtomatynan ózine oq atty” degenge senbeidi. Olar uldarynyń ólimin ádil tergeýdi talap etip otyr.
