قازاقستاندىق زارينا ديياس پاريجدە ٶتٸپ جاتقان رولان گارروس تۋرنيرٸنٸڭ ٷشٸنشٸ اينالىمىنا شىعا المادى, دەپ حابارلايدى "ۇلت اقپارات".
دٷنيەجٷزٸلٸك رەيتينگتە 93-ورىندا تۇرعان ز.ديياس ەكٸنشٸ اينالىمدا ەلەمنٸڭ 15-ٸنشٸ, وسى دودانىڭ 14-راكەتكاسى, بەلگييالىق ەليزا مەرتەنسپەن شەبەرلٸك بايقاستى.
بۇعان دەيٸن قارسىلاستار ٶتكەن جىلى فەدەراتسييا كۋبوگىندا كەزدەسٸپ, وندا بەلگييالىق سپورتشى 1:6, 6:2, 6:1 ەسەبٸمەن جەڭٸسكە جەتكەن ەدٸ.
بۇل جولى بٸرٸنشٸ پارتييادا ە.مەرتەنس 4:2 ەسەبٸمەن الدا تۇردى. دەگەنمەن زارينا قاتارىنان تٶرت گەيمدٸ الدى – 6:4.
ەكٸنشٸ سەتتە بەلگييالىق تەننيسشٸ ايقىن باسىمدىلىق كٶرسەتتٸ – 6:2.
ٷشٸنشٸ, شەشۋشٸ پارتييادا ەسەپ 3:3 بولعان مەزەتتە ە.مەرتەنس برەيك جاساپ كەتتٸ. اقىرى ماتچقا دوپ بەرگەندە, جەڭٸستٸ جۇلىپ الدى – 6:4.
تارتىستى ٶتكەن بەسەكە 2 ساعات 27 مينۋتقا سوزىلدى.
ە.مەرتەنس ٷشٸنشٸ اينالىمدا ەلەمنٸڭ 18-راكەتكاسى, گرەكييالىق مارييا ساككاريمەن كەزدەسەدٸ.
ز.ديياس ٶز سپورتتىق جولىندا بۇعان دەيٸن دە رولان گارروس تۋرنيرٸنٸڭ ٷشٸنشٸ اينالىمىنا شىعا الماعان ەدٸ.
ەسكە سالا كەتەيٸك, بۇدان بۇرىن يۋلييا پۋتينتسەۆانىڭ جۇپتىق سىندا رولان گارروس تۋرنيرٸنٸڭ ەكٸنشٸ اينالىمىنا ٶتكەنٸن, ەلەنا رىباكينانىڭ العاش رەت ٷشٸنشٸ اينالىمعا شىققانىن جازعان بولاتىنبىز.
سونداي-اق قازاقستاندىق تەننيسشٸلەر جۇپتىق بەسەكەلەرٸن سەتتٸ ٶتكٸزۋدە.
ا.بۋبليك پەن ا.گولۋبەۆ جۇپتىق سىندا ٷشٸنشٸ اينالىمعا شىقتى.
