قازاقستان مۇسىلماندارى دٸني باسقارماسى مەكتەپ وقۋشىلارىنىڭ ورامال تاعۋىنا قاتىستى پٸكٸر بٸلدٸردٸ. قمدب باليعات جاسىنا جەتكەن مۇسىلمان قىزدارعا مەكتەپ فورماسىنا ٷيلەسٸمدٸ ورامال تاعۋعا مٷمكٸندٸك بەرٸلۋٸ كەرەك دەپ سانايدى, دەپ حابارلايدى ult.kz.
بۇعان دەيٸن وقۋ-اعارتۋ مينيسترٸنٸڭ مەكتەپ فورماسىنا قويىلاتىن تالاپتاردى ساقتاماعان, سونىڭ ٸشٸندە وقۋشى قىزدارعا ورامال تاعۋعا رۇقسات بەرگەن جەكەمەنشٸك بٸلٸم بەرۋ ۇيىمدارىنا ليتسەنزييادان ايىرۋعا دەيٸن شارا قولدانىلۋى مٷمكٸن ەكەنٸ تۋرالى مەلٸمدەمەسٸ قوعامدا قىزۋ تالقىلانعان ەدٸ.
وسىعان بايلانىستى قمدب ٶزٸنٸڭ ۇستانىمىن جارييالادى.
دٸني باسقارمانىڭ مەلٸمدەۋٸنشە, يسلام شاريعاتى بويىنشا باليعات جاسىنا جەتكەن مۇسىلمان قىزدىڭ ورامال تاعۋى – پارىز. قمدب بۇل مەسەلەدەگٸ دٸني ٷكٸم ٶزگەرمەيتٸنٸن اتاپ ٶتتٸ.
ۇيىم بۇعان دەيٸن دە مەملەكەتتٸك ورگاندارعا مەكتەپ فورماسىنىڭ تٷسٸ مەن جالپى ٷلگٸسٸنە سەيكەس كەلەتٸن ورامال تاعۋعا مٷمكٸندٸك بەرۋ جٶنٸندە ۇسىنىس جاساعانىن ايتتى.
«قازاقستان مۇسىلماندارى دٸني باسقارماسى باليعات جاسىنا جەتكەن مۇسىلمان قىزداردىڭ مەكتەپ فورماسىنا ٷيلەسٸمدٸ ورامال تاعۋىنا مٷمكٸندٸك بەرٸلۋٸ كەرەك دەپ ەسەپتەيدٸ», – دەلٸنگەن حابارلامادا.
قمدب ٶكٸلدەرٸنٸڭ پٸكٸرٸنشە, وقۋشىنىڭ ورامال تاعۋى ونىڭ بٸلٸم الۋىنا كەدەرگٸ بولماۋى تيٸس. سونداي-اق ورامال تاعۋعا مٷمكٸندٸك بەرگەن جەكەمەنشٸك مەكتەپتەردٸ ليتسەنزييادان ايىرۋ سيياقتى قاتاڭ شارالاردى دٸني باسقارما قۇپتامايدى.
دٸني باسقارما زايىرلى مەملەكەت ۇستانىمى دٸندٸ جوققا شىعارۋ نەمەسە ازاماتتاردىڭ دٸني سەنٸمٸن شەكتەۋ دەگەندٸ بٸلدٸرمەيتٸنٸن اتاپ ٶتتٸ. قمدب بۇل مەسەلەنٸ تەك تىيىم سالۋ نەمەسە ەكٸمشٸلٸك شارالار ارقىلى شەشۋ قوعامداعى تٷسٸنٸسپەۋشٸلٸكتٸ كٷشەيتۋٸ مٷمكٸن دەپ سانايدى.
وسىعان بايلانىستى ۇيىم وقۋ-اعارتۋ مينيسترلٸگٸ مەن ٶزگە دە ۋەكٸلەتتٸ ورگاندارعا مەكتەپ فورماسىنىڭ تالاپتارىن ساقتاي وتىرىپ, باليعات جاسىنا جەتكەن مۇسىلمان قىزداردىڭ ورامال تاعۋىنا مٷمكٸندٸك بەرەتٸن ناقتى قۇقىقتىق تەتٸكتٸ قاراستىرۋدى ۇسىندى.
قمدب مەسەلەنٸ مەملەكەتتٸك ورگاندار, دٸن ٶكٸلدەرٸ, اتا-انالار مەن ساراپشىلاردىڭ قاتىسۋىمەن اشىق ەرٸ سىندارلى ديالوگ ارقىلى شەشۋگە دايىن ەكەنٸن مەلٸمدەدٸ.
