Qazaqstan musylmandary dini basqarmasy mektep oqýshylarynyń oramal taǵýyna qatysty pikir bildirdi. QMDB baliǵat jasyna jetken musylman qyzdarǵa mektep formasyna úilesimdi oramal taǵýǵa múmkindik berilýi kerek dep sanaidy, dep habarlaidy ult.kz.
Buǵan deiin Oqý-aǵartý ministriniń mektep formasyna qoiylatyn talaptardy saqtamaǵan, sonyń ishinde oqýshy qyzdarǵa oramal taǵýǵa ruqsat bergen jekemenshik bilim berý uiymdaryna litsenziiadan aiyrýǵa deiin shara qoldanylýy múmkin ekeni týraly málimdemesi qoǵamda qyzý talqylanǵan edi.
Osyǵan bailanysty QMDB óziniń ustanymyn jariialady.
Dini basqarmanyń málimdeýinshe, islam shariǵaty boiynsha baliǵat jasyna jetken musylman qyzdyń oramal taǵýy – paryz. QMDB bul máseledegi dini úkim ózgermeitinin atap ótti.
Uiym buǵan deiin de memlekettik organdarǵa mektep formasynyń túsi men jalpy úlgisine sáikes keletin oramal taǵýǵa múmkindik berý jóninde usynys jasaǵanyn aitty.
«Qazaqstan musylmandary dini basqarmasy baliǵat jasyna jetken musylman qyzdardyń mektep formasyna úilesimdi oramal taǵýyna múmkindik berilýi kerek dep esepteidi», – delingen habarlamada.
QMDB ókilderiniń pikirinshe, oqýshynyń oramal taǵýy onyń bilim alýyna kedergi bolmaýy tiis. Sondai-aq oramal taǵýǵa múmkindik bergen jekemenshik mektepterdi litsenziiadan aiyrý siiaqty qatań sharalardy dini basqarma quptamaidy.
Dini basqarma zaiyrly memleket ustanymy dindi joqqa shyǵarý nemese azamattardyń dini senimin shekteý degendi bildirmeitinin atap ótti. QMDB bul máseleni tek tyiym salý nemese ákimshilik sharalar arqyly sheshý qoǵamdaǵy túsinispeýshilikti kúsheitýi múmkin dep sanaidy.
Osyǵan bailanysty uiym Oqý-aǵartý ministrligi men ózge de ýákiletti organdarǵa mektep formasynyń talaptaryn saqtai otyryp, baliǵat jasyna jetken musylman qyzdardyń oramal taǵýyna múmkindik beretin naqty quqyqtyq tetikti qarastyrýdy usyndy.
QMDB máseleni memlekettik organdar, din ókilderi, ata-analar men sarapshylardyń qatysýymen ashyq ári syndarly dialog arqyly sheshýge daiyn ekenin málimdedi.
