قازاقستاندىق ۆاكتسينا سالعىزعان 200-دەن استام ەرٸكتٸنٸڭ سەگٸزٸنٸڭ اعزاسىندا انتيدەنە تولىق قالىپتاسپاعان, دەپ حابارلايدى قازاقپارات.
ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا باق ٶكٸلدەرٸ وتاندىق ۆاكتسينانىڭ كلينيكالىق سىناعىنا قاتىسقان ەرٸكتٸلەر تۋرالى سۇراق قويدى. «سىناققا قاتىسقان 202 ەرٸكتٸنٸڭ ٸشٸندە 8 ادامنىڭ اعزاسىندا قالايشا انتيدەنە ويانباعان? ونى قالاي بٸلدٸڭٸزدەر», - دەگەن ساۋالعا بيولوگييالىق قاۋٸپسٸزدٸك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كٷنسۇلۋ زاكاريا جاۋاپ بەردٸ.
«يممۋنوگرامما ارقىلى انتيدەنەنٸڭ قابٸلەتٸن كٶرۋگە بولادى. يممۋنيتەت انىقتالعان جوق دەگەن سٶزدٸڭ ٶزٸ دۇرىس ەمەس. يممۋنيتەت بار, بٸراق تٶمەن, بٸز بەلگٸلەگەن دەڭگەيگە جەتپەگەن. بۇل –تابيعي اعزانىڭ تابيعي ٷدەرٸسٸ. نەگٸزٸنەن ولار جاسى 40-تان اسقان ادامدار بولاتىن», - دەدٸ كۇنسۇلۋ زاكارييا.
عالىم اتالعان ەرٸكتٸلەردٸڭ ۆيرۋس جۇقتىرماعانىن دا اتاپ ٶتتٸ.
«ولار اۋىرعان جوق. اعزالارىندا انتيدەنە تولىق قالىپتاسپاسا دا, تٶمەن شوعىرى پايدا بولدى. ەرٸكتٸلەر اراسىندا ۆيرۋس جۇقتىرعاندار جوق. يممۋندىق جاۋاپ كٶپتەگەن فاكتورلارعا, ادام دەنەسٸنٸڭ سول كەزدەگٸ كٷيٸنە, سوزىلمالى اۋرۋلارعا بايلانىستى. وسى سيياقتى فاكتورلاردى ەسەپكە الماساق, ەرٸكتٸلەردٸڭ اعزاسىندا ۆاكتسينالاردىڭ جەكەلەگەن تٷرلەرٸ يممۋنيتەت قالىپتاستىرا الادى. ول ٷشٸن اعزانىڭ يممۋندىق دەڭگەيٸن كٶتەرۋ كەرەك» - دەدٸ مامان.
