ەلەمدٸك وپەرا ساحناسىندا قازاقستاننىڭ ابىرويىن اسقاقتاتىپ جٷرگەن بەلگٸلٸ وپەرا ەنشٸسٸ مايرا مۇحامەدقىزى ەلدەگٸ ٶنەر ادامدارىنا كٶرسەتٸلەتٸن قۇرمەت جايلى جان سىرىن اقتاردى, دەپ حابارلايدى ult.kz.
ٶنەر يەسٸ حالىقارالىق دەڭگەيدە زور جەتٸستٸكتەرگە جەتٸپ, ەلەمنٸڭ ەڭ بەدەلدٸ تەاترلارى مەن كونتسەرتتٸك ساحنالارىندا ٶنەر كٶرسەتكەنٸمەن, تۋعان جەرٸندە ەڭبەگٸنٸڭ لايىقتى باعالانباي جٷرگەنٸنە قىنجىلاتىنىن جاسىرمادى. ونىڭ ايتۋىنشا, شەتەلدە ٶنەرٸنە جوعارى باعا بەرٸلٸپ, ەرەكشە قۇرمەت كٶرسەتٸلٸپ, تٷرلٸ شىعارماشىلىق ۇسىنىستار تٷسسە دە, ٶز ەلٸندە دەل سونداي قولداۋ مەن مويىنداۋدى سەزٸنە بەرمەيدٸ.
مايرا مۇحامەدقىزى بۇل تاقىرىپتى قوزعاعاندا ەرەكشە تولقىپ, كٶزٸنە جاس الدى. ەنشٸ ٷشٸن تۋعان ەلٸنٸڭ ىقىلاسى مەن باعاسى كەز كەلگەن ماراپاتتان قىمبات ەكەنٸن ايتىپ, قازاقستاندا ٶنەر جولىندا سٸڭٸرگەن ەڭبەگٸ ەلەۋسٸز قالىپ جاتقانداي ەسەردە ەكەنٸن جەتكٸزدٸ.
ول شەتەلدە قازاقستاننىڭ مەدەنيەتٸ مەن ٶنەرٸن تانىتىپ جٷرگەن ەربٸر ٶنەرپازدىڭ ەڭبەگٸ ەل ٸشٸندە دە لايىقتى باعالانۋى قاجەت ەكەنٸن اتاپ ٶتتٸ. ٶنەر يەسٸنٸڭ بۇل جانايقايى ەلەۋمەتتٸك جەلٸ قولدانۋشىلارى اراسىندا قىزۋ تالقىلانىپ, كٶپشٸلٸك ونىڭ سٶزٸن قولداپ, ەل نامىسىن حالىقارالىق ساحنادا قورعاپ جٷرگەن تالانتتارعا كٶبٸرەك قۇرمەت كٶرسەتٸلۋٸ كەرەكتٸگٸن جازۋدا.
