فوتو: اقوردا
بٷگٸن مەملەكەت باسشىسى قاسىم-جومارت توقاەۆ ۇستازداردىڭ رەسپۋبليكالىق تامىز كونفەرەنتسيياسىندا بٸلٸم بەرۋ سالاسىن دامىتۋ مەن پەداگوگتەردٸڭ مەرتەبەسٸن كٶتەرۋ مەسەلەلەرٸنە توقتالدى, دەپ حابارلايدى Ult.kz.
پرەزيدەنتتٸڭ ايتۋىنشا, 2019 جىلدان بەرٸ بٸلٸم سالاسىنىڭ بيۋدجەتٸ ٷش ەسە ۇلعايىپ, 1 ميلليوننان استام وقۋشىعا ارنالعان 1200 مەكتەپ اشىلدى. «كەلەشەك مەكتەپتەرٸ» ۇلتتىق جوباسى اياسىندا 217 جاڭا مەكتەپ سالۋ جوسپارلانسا, ونىڭ 128-ٸ قازٸردٸڭ ٶزٸندە پايدالانۋعا بەرٸلگەن.
سونداي-اق, «پەداگوگ مەرتەبەسٸ تۋرالى» زاڭ قابىلدانىپ, «قازاقستاننىڭ ەڭبەك سٸڭٸرگەن ۇستازى» اتاعى بەكٸتٸلدٸ. بٷگٸندە 74 پەداگوگ وسى قۇرمەتكە يە بولدى, ال ەكٸ مۇعالٸمگە «قازاقستاننىڭ ەڭبەك ەرٸ» اتاعى بەرٸلگەن.
مەملەكەت باسشىسى سوڭعى تٶرت جىلدا مۇعالٸمدەردٸڭ جالاقىسى ەكٸ ەسە ٶسكەنٸن اتاپ ٶتٸپ, 500 مىڭنان استام ۇستازعا ٷستەمە اقى تٶلەنەتٸنٸن جەتكٸزدٸ. پەداگوگتەر ارتىق جۇمىستاردان بوساتىلىپ, نازارىن وقىتۋ ٸسٸنە تولىق ارناۋعا مٷمكٸندٸك الدى.
«بٷگٸن سانالى ۇرپاق تەربيەلەي الساق, ەرتەڭ زامان كٶشٸنٸڭ باسىندا جٷرەمٸز. سوندىقتان بٸلٸم بەرۋ سالاسىن قولداۋ – مەملەكەتتٸك ساياساتتىڭ باستى باسىمدىعى بولىپ قالا بەرەدٸ», – دەدٸ پرەزيدەنت.
