بٷگٸن فۋتبولدان پرەمەر-ليگا كوماندالارى اراسىندا قازاقستان چەمپيوناتىنىڭ 16-تۋرىندا «استانا» مەن «قايرات» كوماندالارى كەزدەستٸ, دەپ حابارلايدى "ۇلت اقپارات".
بۇعان دەيٸن ەكٸ كوماندا 40 مەرتە كەزدەستٸ. ونىڭ 18-دە «استانا» باسىمدىق تانىتسا, 12-ٸ «قايراتتىڭ» جەڭٸسٸمەن اياقتالدى. قالعانىندا تەڭ نەتيجە تٸركەلدٸ .
بٷگٸنگٸ كەزدەسۋدە تارتىستى ويىن ٶربٸدٸ. ەكٸ كوماندا الما-كەزەك شابۋىلعا يەك ارتتى. ويىننىڭ 31-مينۋتىندا «قايراتتىڭ» شابۋىلشىسى ابات ايىمبەتوۆ ەسەپ اشتى. وسىلايشا ول بيىل ٶزٸنٸڭ ونىنشى دوبىن سوقتى. سۇرمەرگەندەر كٶشٸندە 10 گولمەن «ورداباسى» ويىنشىسى جواو پاولو العاشقى ەكٸ ورىندى ٶزارا بٶلٸسٸپ تۇر.
بٷگٸن «قايرات» باستى قارسىلاسىن 1:0 ەسەبٸمەن جەڭدٸ. تۋرنير كەستەسٸندە ولاردان 14 ۇپايعا ۇزاپ كەتتٸ. «قايراتتا» 16 ويىننان كەيٸن 41, «استانادا» 15 ويىننان كەيٸن 27 ۇپاي بار. الماتىلىق كلۋب چەمپيوندىق اتاققا بٸر تابان جاقىنداي تٷستٸ.
«استانا» ەندٸ بەس ويىن ٶتكٸزەدٸ. ال «قايراتتىڭ» الدا تٶرت كەزدەسۋٸ بار.
سونداي-اق, بٷگٸن شىمكەنتتٸڭ «ورداباسى» جەنە قوستانايدىڭ «توبىل» كوماندالارى اراسىندا قىزىقتى جەكپە-جەك ٶتتٸ. بۇل كەزدەسۋدە قوستانايلىق كلۋب ساپىنان 48-مينۋتتا رۋسلان ۆاليۋللين ەسەپ اشسا, 57-مينۋتتا شىمكەنتتٸك فۋتبولشى ۆيكتور دميتريەنكو ٶزٸنٸڭ قاقپاسىنا گول سوعىپ الدى. قورىتىندى ەسەپتٸ 84-مينۋتتا «توبىل» ويىنشىسى سەنان سەباي بەلگٸلەدٸ. وسىلايشا قوستانايلىق ۇجىم قارسىلاسىن 3:0 ەسەبٸمەن تٸزە بٷكتٸردٸ.
بٷگٸن اتالعان تۋردا ەندٸ «قايسار» مەن «قاسپيي» كوماندالارى كەزدەسەدٸ. ويىن ەلوردا ۋاقىتىمەن 19.00-دە باستالادى.
ەرتەڭ, 31 قازاندا «قىزىلجار» مەن «جەتٸسۋ», «وقجەتپەس» پەن «تاراز» كوماندالارى شەبەرلٸك بايقاسادى.
