ٶزبەكستاننىڭ زارافشان قالاسى تٷبٸندەگٸ راحات اۋىلىندا تۇراتىن قازاقتار.
ٶزبەكستانداعى قازاقتىڭ سانى 32 جىل بويى ٶسپەي, شامامەن بۇرىنعى دەڭگەيٸندە قالعان. بۇل جٶنٸندە ازاتتىقتىڭ ٶزبەك قىزمەتٸ حابارلادى, دەپ جازادى ازاتتىق راديوسى.
ەلدٸڭ ستاتيستيكا جٶنٸندەگٸ مەملەكەتتٸك كوميتەتٸنٸڭ دەرەگٸ بويىنشا, 1989 جىلى ٶزبەكستاندا 808,2 مىڭ قازاق بولسا, قازٸر 821,2 مىڭ قازاق تۇرادى.
سانى جاعىنان قازاقتار ٶزبەكستاندا ٶزبەك پەن تەجٸكتەن كەيٸنگٸ ٷشٸنشٸ ورىندا تۇر.
ەلدەگٸ جالپى حالىق سانى 34,6 ميلليونعا جەتتٸ. ال 1989 جىلى تۇرعىن سانى 19,81 ملن بولعان ەدٸ. ٶزبەكستانداعى ەڭ ٸرٸ ەتنوستىق توپتار قاتارىنا تەجٸكتەر, قازاقتار, قاراقالپاقتار جەنە ورىستار جاتادى.
وتىز جىلدان استام ۋاقىت ٸشٸندە ٶزبەكستانداعى تەجٸكتەر سانى ەكٸ ەسەلەنگەن. 1989 جىلى مۇندا 933 560 تەجٸك بولسا, قازٸر ەلدە 1,7 ملن تەجٸك تۇرادى. قاراقالپاقتار سانى دا 411,8 مىڭنان 752,7 مىڭعا ٶسكەن. قىرعىزدار 174,9 مىڭنان 291,6 مىڭعا كٶبەيگەن.
1989 جىلدان بەرٸ ٶزبەكستاننان بٸر ميلليونعا جۋىق ورىس كٶشٸپ كەتكەن. سول جىلى ٶزبەكستاندا 1 ملن 653 مىڭ ورىس بولسا, 2021 جىلى تەك 720,3 مىڭ ورىس قالعان.
ٶزبەكستاندا حالىق ساناعى 2023 جىلى ٶتەدٸ. بۇل تەۋەلسٸز ەل تاريحىنداعى العاشقى ساناق بولماق. بۇدان بۇرىنعى ساناق سوۆەت كەزٸندە, 1989 جىلى ٶتكٸزٸلگەن ەدٸ.
