Ózbekstannyń Zarafshan qalasy túbindegi Rahat aýylynda turatyn qazaqtar.
Ózbekstandaǵy qazaqtyń sany 32 jyl boiy óspei, shamamen burynǵy deńgeiinde qalǵan. Bul jóninde Azattyqtyń Ózbek qyzmeti habarlady, dep jazady Azattyq radiosy.
Eldiń statistika jónindegi memlekettik komitetiniń deregi boiynsha, 1989 jyly Ózbekstanda 808,2 myń qazaq bolsa, qazir 821,2 myń qazaq turady.
Sany jaǵynan qazaqtar Ózbekstanda ózbek pen tájikten keiingi úshinshi orynda tur.
Eldegi jalpy halyq sany 34,6 millionǵa jetti. Al 1989 jyly turǵyn sany 19,81 mln bolǵan edi. Ózbekstandaǵy eń iri etnostyq toptar qataryna tájikter, qazaqtar, qaraqalpaqtar jáne orystar jatady.
Otyz jyldan astam ýaqyt ishinde Ózbekstandaǵy tájikter sany eki eselengen. 1989 jyly munda 933 560 tájik bolsa, qazir elde 1,7 mln tájik turady. Qaraqalpaqtar sany da 411,8 myńnan 752,7 myńǵa ósken. Qyrǵyzdar 174,9 myńnan 291,6 myńǵa kóbeigen.
1989 jyldan beri Ózbekstannan bir millionǵa jýyq orys kóship ketken. Sol jyly Ózbekstanda 1 mln 653 myń orys bolsa, 2021 jyly tek 720,3 myń orys qalǵan.
Ózbekstanda halyq sanaǵy 2023 jyly ótedi. Bul táýelsiz el tarihyndaǵy alǵashqy sanaq bolmaq. Budan burynǵy sanaq sovet kezinde, 1989 jyly ótkizilgen edi.
