ٶزبەكستاندا قىرعىزستانعا الىپ باراتىن تاعى بٸر جەر استى جولى تابىلعان. "جەر استى جولىنا ليفت, ەلەكتر جارىعى مەن باقىلاۋ كامەراسى ورناتىلعان" دەپ جازادى ازاتتىقتىڭ ٶزبەك رەداكتسيياسى.
23 ماۋسىمدا فەرعانا وبلىسىنىڭ ريشتان اۋدانىندا تۇراتىن ازاماتتىڭ ٷيٸنەن قىرعىزستاننىڭ باتكەن وبلىسى قادامجاي اۋدانىنا اپاراتىن جەر استى جولى تابىلعان.
جەر استى جولى جايىندا ٶزبەكستان مەملەكەتتٸك قاۋٸپسٸزدٸك قىزمەتٸ حابارلاعان. بۇل حابارعا قاراعاندا, ٶزبەكستان مەملەكەتتٸك قاۋٸپسٸزدٸك قىزمەتٸ مەن وبلىس پوليتسيياسى ارناۋلى وپەراتسييا كەزٸندە جٷك كٶلٸگٸن توقتاتقان. كٶلٸكتەن IPhone 13 Pro Max, Samsung Galaxy S 22 ultra, RedMi Note 11 ماركالى 2707 سمارتفون تابىلعان. تاۋاردىڭ جالپى قۇنى 15 ميلليارد سۋمعا باعالانعان.
كٶلٸك يەسٸنٸڭ ٷيٸن تٸنتٸگەندە جەر استى جولى تابىلعان. جولدىڭ ەنٸ 1-1,5 مەتر, بيٸكتٸ 2 مەتر, ۇزىندىعى 130 مەترگە جۋىق بوپ شىققان. قۇقىق قورعاۋ ورگاندارى جارييالاعان ۆيدەودان جەر استى جولىنىڭ بەتوندالعانى, ٸشٸندە جارىعى مەن ليفتٸسٸ بار ەكەنٸ كٶرٸنەدٸ.
قۇقىق قورعاۋ ورگاندارى تاراتقان حاباردا, جەر استى جولى قىرعىزستاننان ٶزبەكستانعا تاۋار تاسۋعا پايدالانىلعانى ايتىلعان.
ايتا كەتەيٸك, بۇعان دەيٸن دە ەكٸ ەلدٸڭ اراسىندا ۆاليۋتا مەن تٷرلٸ تاۋار تاسۋعا پايدالانىپ جٷرگەن ەكٸ جەر استى جولى تابىلعانى حابارلانعان.
