ٶزبەكستان پرەزيدەنتٸ شاۆكات ميرزيياەۆ "ٶزبەكستان, قازاقستان جەنە تٷركٸمەنستان اراسىنداعى ٷش ەل مەملەكەت شەكارالارىنىڭ تٷيٸسۋ اۋدانى جايلى كەلٸسٸمدٸ راتيفيكاتسييالاۋ تۋرالى" زاڭعا قول قويدى. بۇل تۋرالى ازاتتىقتىڭ ٶزبەك رەداكتسيياسى حابارلادى.
زاڭدى بيىل 5 قاڭتاردا ٶزبەكستان پارلامەنتٸنٸڭ تٶمەنگٸ پالاتاسى قابىلداپ, 29 ناۋرىزدا سەنات ماقۇلداعان.
ٷش جاقتى قۇجاتقا 2017 جىلى 10 قىركٷيەكتە سامارقاندا ٶزبەكستان, قازاقستان جەنە تٷركٸمەنستان سىرتقى ٸستەر مينيسترلەرٸ قول قويعان.
"بۇل - تاريحي قۇجات, سەبەبٸ ول ٷش ەلدٸڭ مەملەكەت شەكاراسىنىڭ قۇقىقتىق جولمەن رەتتەلۋٸنە نٷكتە قويادى" دەپ حابارلاعان ٶزبەكستان پارلامەنتٸ سەناتىنىڭ باسپاسٶز قىزمەتٸ.
قۇجاتتا ٷش ەلدٸڭ مەملەكەتتٸك شەكارالارى تٷيٸسەتٸن ورىن انىقتالىپ, تيٸستٸ انىقتاما بەرٸلگەن. بۇدان ٶزگە, ٷش ەل مەملەكەتتٸك شەكاراسىنىڭ تٷيٸسەتٸن ورنى بٸرلەسە جاسالعان توپوگرافييالىق كارتاعا تٷسٸرٸلگەن.
