ورازا ايت - قوناقجايلىق پەن مەيٸرباندىقتىڭ, دوستىق پەن تاتۋلىقتىڭ مەرەكەسٸ. بۇل تۋرالى قازاقستاندىقتاردى ايت مەرەكەسٸمەن قۇتتىقتاعان قر مۇسىلماندارى دٸني باسقارماسىنىڭ تٶراعاسى سەرٸكباي قاجى وراز ايتتى, دەپ حابارلايدى قازاقپارات.
«قادٸرمەندٸ قاۋىم! بارشاڭىزدى مۇسىلمان ٷمبەتٸنٸڭ ۇلىق مەيرامى - ورازا ايتپەن شىن جٷرەكتەن قۇتتىقتايمىن. قاسيەتتٸ جۇما كٷنٸمەن قاتار كەلگەن ايت مەيرامى قۇتتى-بەرەكەلٸ بولعاي! بٸزدٸڭ حالقىمىز رامازان ايىن ەجەلدەن ەرەكشە قاستەرلەپ: «ون ەكٸ ايدىڭ سۇلتانى», - دەپ قادٸرلەگەن. ال مەرەكە كٷندەرٸ اعايىن-جۇرت بٸر-بٸرٸنە «ايت قابىل بولسىن» ايتىپ, جىلى لەبٸزدەرٸ مەن ٸزگٸ تٸلەكتەرٸن ارناعان. اعايىن-تۋىسقا ايتتاپ بارۋ, بالالار مەن قادٸرلٸ قوناقتارعا ايتتىق بەرۋ - سان عاسىردان بەرٸ جالعاسىپ كەلە جاتقان يگٸ دەستٷر», - دەدٸ باس مٷفتي قۇتتىقتاۋىندا.
سەرٸكباي ورازدىڭ ايتۋىنشا, ورازا ايت - قوناقجايلىق پەن مەيٸرباندىقتىڭ, دوستىق پەن تاتۋلىقتىڭ مەرەكەسٸ. ٸزەتتٸلٸك پەن ٸزگٸلٸككە, بٸرلٸك پەن يگٸلٸككە ٷندەيتٸن بۇل مەيرام ەلٸمٸزدە تۇراتىن تٷرلٸ ۇلتتار مەن ۇلىستاردى دا ىنتىماققا ۇيىستىرا تٷسەدٸ.
«ايت» - «مەرەكەلەۋ», «حال سۇراسۋ», «بٸر-بٸرٸن قۋانتۋ», «قۋانىشقا توپتالۋ» دەگەن سٶز. دەمەك, بۇل كٷندەرٸ وتباسىن, اعايىن-تۋىس, كٶرشٸلەر مەن كٶمەككە مۇقتاج جانداردى قۋانىشقا بٶلەپ, العىسىن الۋدىڭ - ساۋابى ٷلكەن. جابىققان جاننىڭ كٶڭٸلٸن جادىراتىپ, شاڭىراقتى شات-شادىمان كٷيگە بٶلەپ, سىيلىق ٷلەستٸرۋ دە - مەرەكەنٸڭ سەنٸن كەلتٸرە تٷسەتٸن ٸزگٸ امالدىڭ بٸرٸ.
ۇلىق مەيرامدا تولىق جۋىنىپ, جۇپار يٸس سەبٸنٸپ, جاماعاتپەن ايت نامازىنا قاتىسۋدىڭ ساۋابى ەرەكشە. ايت نامازىنا بارۋدان بۇرىن قۇرمادان دەم تاتۋ - پايعامبارىمىز مۇحاممەدتٸڭ (وعان اللانىڭ سالاۋاتى مەن سەلەمٸ بولسىن) سٷننەت امالى.
«ورازا ايت - بٸر اي بويى تٶزٸمدٸلٸك تانىتىپ اۋىز بەكٸتكەن, ىقىلاسپەن قايىرىمدىلىق جاساعان پەندەنٸڭ قۇرمەت پەن ماراپاتقا, قۋانىش پەن ساۋاپقا كەنەلەتٸن سەت (...) مۇسىلمان قاۋىمىنىڭ وسىناۋ شۋاقتى مەيرامىندا ەربٸر شاڭىراققا باياندى باقىت, اللانىڭ اماندىعى مەن بەرەكەتٸن تٸلەيمٸن», - دەدٸ باس مٷفتي.
ەسكە سالايىق, بيىل 17 مامىردا باستالعان ورازا ايى 14 ماۋسىمدا اياقتالدى. قادىر تٷنٸ ماۋسىمنىڭ 11-ٸنەن 12-سٸنە قاراعان تٷنٸ اتاپ ٶتٸلدٸ.
بٷگٸن, 15 ماۋسىمدا (جۇما) ورازا ايت مەيرامىنىڭ العاشقى كٷنٸ باستالدى.
